रत्नागिरी / संतोष पवार : त्रिरत्न बौद्ध महासंघ रत्नागिरीच्या वतीने रविवार, दिनांक ८ ते ११ नोव्हेंबर दरम्यान चार दिवसीय निवासी ‘धम्मक्रांती शिबिरा’चे आयोजन करण्यात आले आहे. हे शिबिर शहरातील नामांकित पटवर्धन हायस्कूल येथे संपन्न होणार असून, यामध्ये ‘भगवान गौतम बुद्ध आणि त्यांच्या धम्माचे भवितव्य’ या महत्त्वपूर्ण विषयावर सखोल चिंतन व मार्गदर्शन घडवून आणले जाणार आहे.
या चार दिवसीय शिबिराचे नेतृत्व पुण्यातील ज्येष्ठ धम्मचारी यशोरत्न करणार आहेत. त्यांच्यासह धम्मचारी सत्यरत्न, चंद्रनाथ, सत्यसागर, सुनंदक, प्रज्ञावज्र आणि शीलनंदक हे मान्यवर उपस्थित राहून शिबिरार्थींना बुद्ध धम्माच्या विविध पैलूंवर अभ्यासपूर्ण प्रवचने व मार्गदर्शन देणार आहेत. हे शिबिर पूर्णतः निवासी स्वरूपाचे असून, १४ वर्षांवरील जास्तीत जास्त विद्यार्थी व विद्यार्थिनींनी या शिबिरात सहभागी होऊन धम्मज्ञानाचा लाभ घ्यावा, असे आवाहन आयोजकांकडून करण्यात आले आहे. या शिबिरासाठी नाममात्र अडीचशे रुपये दानमूल्य ठेवण्यात आले आहे.
शिबिराच्या यशस्वीतेसाठी धम्ममित्र संतोष गमरे, रविकांत पवार, आनंदा कांबळे, भीमदास जाधव, भगवान जाधव, संदीप कांबळे, अनामिका जाधव, चंद्रलेखा पवार, स्मृती मोहिते, उमा गमरे, रुचिता शिंदे आणि सुप्रिया सावंत यांच्यासह अनेक कार्यकर्ते विशेष परिश्रम घेत आहेत.
