रायगड: राज्यभरात गणेशोत्सवाचा उत्साह शिगेला पोहोचलेला असतानाच ऐतिहासिक किल्ले रायगडावर एक अत्यंत दुर्दैवी आणि काळजाचा ठोका चुकवणारी दुर्घटना घडली आहे. गडावरील हत्ती तलाव परिसरात फिरत असताना पाय घसरून खाली पडल्याने दीपक शंकर गोसावी (वय अंदाजे, रा. सातारा) या शिवप्रेमी पर्यटकाचा जागीच मृत्यू झाला. ऐन उत्सवाच्या काळात आणि स्वतःच्या मित्रांच्या देखत घडलेल्या या दुर्घटनेमुळे संपूर्ण परिसरात हळहळ व्यक्त केली जात आहे.
मिळालेल्या माहितीनुसार, दीपक गोसावी हे आपल्या काही मित्रांसोबत किल्ले रायगडावर पर्यटनासाठी आले होते. दुपारी ते लघुशंकेसाठी हत्ती तलाव परिसराच्या दिशेने निघाले होते. गडावर गेल्या काही दिवसांपासून पडणाऱ्या संततधार पावसामुळे या भागातील मार्ग निसरडा झाला होता. चालताना अचानक पाय घसरल्याने दीपक गोसावी थेट जमिनीवर आदळले. यात त्यांच्या डोक्याला अतिशय गंभीर स्वरूपाची दुखापत झाली आणि मोठ्या प्रमाणावर रक्तस्राव झाल्याने त्यांचा घटनास्थळीच मृत्यू ओढवला.
मित्रांनी कुठलाही विलंब न लावता स्थानिक ग्रामस्थ आणि पोलिसांना या घटनेची कल्पना दिली. माहिती मिळताच महाड तालुका पोलिसांचे पथक तात्काळ घटनास्थळी दाखल झाले. त्यानंतर स्थानिक ग्रामस्थ, पोलीस आणि सोबत आलेल्या मित्रांच्या साहाय्याने दीपक गोसावी यांचा मृतदेह डोलीतून गडावरून खाली आणण्यात आला. पुढील सोपस्कारांसाठी मृतदेह महाड येथील शासकीय ग्रामीण रुग्णालयात शवविच्छेदनासाठी पाठवण्यात आला असून, महाड तालुका पोलीस ठाण्यात अकस्मात मृत्यूची नोंद करून पुढील तपास सुरू करण्यात आला आहे.
