दिल्ली: निवडणूक आयोगातील अंतर्गत मतभेदांची ठिणगी उडाल्यानंतर देशातील राजकीय वर्तुळात तीव्र घडामोडींना वेग आला आहे. एसआयआर प्रकरणावरून विरोधक आधीच आक्रमक भूमिकेत असताना आता ‘कॉक्रोच जनता पक्ष’ या नव्या राजकीय घटकानेही या वादात उडी घेत मुख्य निवडणूक आयुक्त ज्ञानेश कुमार यांच्याविरोधात थेट आघाडी उघडली आहे. पक्षाचे संस्थापक अभिजीत दीपके यांनी ज्ञानेश कुमार यांना पदावरून पायउतार होण्यासाठी थेट ४८ तासांचा अवधी दिला असून, राजीनामा न आल्यास देशभरात तीव्र आंदोलने छेडण्याचा इशारा दिला आहे.
आयोगातील दुफळी आणि प्रशासकीय कारभारावर बोट ठेवत दीपके यांनी अत्यंत कठोर शब्दांत ताशेरे ओढले आहेत. एसआयआरच्या माध्यमातून देशातील तब्बल १३ कोटींहून अधिक नागरिकांचे मतदानाचे घटनादत्त अधिकार हिरावून घेतले गेल्याचा गंभीर दावा त्यांनी केला आहे. लोकशाही व्यवस्थेत जनतेला सरकार निवडण्याचा मूलभूत अधिकार असतो, मात्र सध्याच्या कारभारामुळे कोण मतदान करणार आणि कोणाला मतदानापासून वंचित ठेवले जाणार हे सरकारच ठरवत असल्यासारखी परिस्थिती निर्माण झाली आहे, असा घणाघात त्यांनी केला. ज्ञानेश कुमार यांच्या कार्यकाळात लोकशाहीच्या मूळ संकल्पनेला छेद देत अघोषित हुकूमशाही प्रस्थापित केली गेल्याचा थेट आरोपही त्यांनी लावला आहे.
निवडणूक आयुक्तांमधील उफाळलेल्या अंतर्गत संघर्षाचा संदर्भ देत विरोधकांनी आणि सीजेपीने ज्ञानेश कुमार यांच्यावर देशाशी प्रतारणा केल्यासारखे गंभीर आरोप केल्याने केंद्र सरकारवरील राजकीय दबाव मोठ्या प्रमाणावर वाढला आहे. दिलेल्या ४८ तासांच्या मुदतीनंतर हे आंदोलन देशभरात नेमके कोणते वळण घेणार आणि आयोग यावर काय भूमिका स्पष्ट करणार, याकडे आता संपूर्ण राजकीय विश्वाचे लक्ष वेधले गेले आहे.
