रत्नागिरी जिल्हा केमिस्ट अँड डिस्ट्रीब्युटर्स असोसिएशनवर ‘निर्भय पॅनेल’चा निर्विवाद विजय; सर्व ९ जागांवर दणदणीत यश

रत्नागिरी: ‘डिस्ट्रिक्ट केमिस्ट अँड डिस्ट्रीब्युटर्स असोसिएशन, रत्नागिरी’च्या त्रैवार्षिक निवडणुकीत मोठा राजकीय उलटफेर पाहायला मिळाला असून, सर्वसाधारण केमिस्ट सभासदांच्या ‘निर्भय पॅनेल’ने प्रतिस्पर्धी ‘एकता पॅनेल’चा पूर्ण धुव्वा उडवत ऐतिहासिक विजय संपादन केला आहे. रविवारी, ४ ऑक्टोबर रोजी पार पडलेल्या या अत्यंत चुरशीच्या रणधुमाळीत जिल्हाभरातून केमिस्ट बंधूंनी उत्स्फूर्त प्रतिसाद नोंदवत तब्बल ८८ टक्के विक्रमी मतदान केले. असोसिएशनच्या सर्वच्या सर्व ९ प्रमुख जागांवर निर्भय पॅनेलच्या उमेदवारांनी भरघोस मताधिक्य मिळवून संघटनेची सर्व सूत्रे आपल्या हाती घेतली आहेत. एमएससीडीएच्या (MSCDA) खजिनदारांचे ‘एकता पॅनेल’ विरुद्ध सामान्य केमिस्टचे ‘निर्भय पॅनेल’ अशा थेट आणि अटीतटीच्या झालेल्या या लढतीत सभासदांनी एकाधिकारशाही व ‘मी म्हणजेच संघटना’ अशा चाललेल्या मनमानी राजकारणाला मतपेटीतून जोरदार चपराक लगावली असल्याची भावना व्यक्त केली जात आहे. या एकतर्फी विजयानंतर अध्यक्षपदी राजेश घोसाळकर, सचिवपदी सचिन कोतवडेकर, खजिनदारपदी प्रफुल्ल लांजेकर, कार्याध्यक्षपदी संदीप गुजर, उपाध्यक्षपदी अभिजीत आवळे, सहसचिवपदी रुपेश शेलार तसेच कार्यकारिणी सदस्य म्हणून आरिफ मेमन, निहार गुडेकर आणि मुबीन मालगुंडकर यांची अधिकृत निवड झाली असून, या ऐतिहासिक विजयामुळे रत्नागिरी जिल्हा केमिस्ट असोसिएशनमध्ये आता नव्या, पारदर्शक आणि खऱ्या अर्थाने लोकशाही पर्वाला सुरुवात झाली आहे.