मुंबई : महाराष्ट्राच्या राजकीय आणि सहकार क्षेत्रातील मातब्बर घराणे असलेल्या विखे पाटील कुटुंबातील चौथ्या पिढीने आंतरराष्ट्रीय राजकारणात ऐतिहासिक भरारी घेतली आहे. राज्याचे जलसंपदा मंत्री तथा कॅबिनेट मंत्री राधाकृष्ण विखे पाटील यांची पुतणी नीला विखे पाटील यांची स्वीडनच्या संसदेत खासदार म्हणून निवड झाली आहे. स्वीडनच्या ३४९ सदस्यीय संसदेत म्हणजेच ‘रिक्सडॅग’मध्ये त्यांनी स्टॉकहोम शहर मतदारसंघातून विजय संपादन केला असून, महाराष्ट्राच्या या कन्येने जागतिक पटलावर मिळवलेल्या या यशाबद्दल सर्व स्तरातून कौतुक होत आहे. काका राधाकृष्ण विखे पाटील यांनी सोशल मीडियावरील आपल्या अधिकृत ट्विटर खात्यावरून लाडक्या पुतणीचे अभिनंदन करत संपूर्ण परिवारासाठी ही अत्यंत अभिमानाची आणि आनंदाची बाब असल्याचे म्हटले आहे.
४१ वर्षीय नीला विखे पाटील या आशियातील पहिल्या सहकारी साखर कारखान्याची मुहूर्तमेढ रोवणारे सहकारमहर्षी विठ्ठलराव विखे पाटील यांच्या पणती तर माजी केंद्रीय मंत्री दिवंगत बाळासाहेब विखे पाटील यांच्या नात आहेत. प्रसिद्ध शिक्षणतज्ज्ञ डॉ. अशोक विखे पाटील यांच्या त्या कन्या आहेत. नीला यांचा जन्म स्वीडनमध्येच झाला असला तरी त्यांचे बालपण अहिल्यानगरमध्ये गेले. स्वीडनच्या गोथेनबर्ग स्कूल ऑफ बिझनेस येथून त्यांनी अर्थशास्त्र, कायदा आणि पुढे एमबीएचे उच्च शिक्षण पूर्ण केले आहे. सुरुवातीपासूनच सामाजिक व सार्वजनिक कार्यात सक्रिय राहिलेल्या नीला यांनी स्वीडनच्या ‘ग्रीन पार्टी’कडून निवडणूक लढवत हा विजय साकारला. यापूर्वी त्यांनी स्वीडनचे माजी पंतप्रधान स्टीफन लोफवेन यांच्या कार्यकाळात राजकीय सल्लागार म्हणूनही महत्त्वपूर्ण जबाबदारी सांभाळली होती.
स्वीडनच्या राष्ट्रीय निवडणुकीत डाव्या विचारसरणीच्या विरोधी पक्षांनी एकत्रितपणे ३४९ पैकी १७६ जागा जिंकत बहुमत मिळवले आहे, तर सत्ताधारी पुराणमतवादी सरकारला १७३ जागा मिळाल्या आहेत. या अत्यंत अटीतटीच्या राजकीय घडामोडींमध्ये नीला विखे पाटील यांची झालेली निवड आंतरराष्ट्रीय स्तरावर विशेष महत्त्वाची मानली जात आहे. माझे बंधू डॉ. अशोक विखे पाटील यांनी आपल्या मुलांच्या शिक्षणासाठी घेतलेली अफाट मेहनतच आज नीलाच्या यशाचे मूळ कारण असून, ती स्वीडनच्या संसदेत लोकप्रतिनिधी म्हणून नागरिकांच्या अपेक्षा प्रभावीपणे पूर्ण करेल, असा ठाम विश्वास मंत्री राधाकृष्ण विखे पाटील यांनी यावेळी व्यक्त केला आहे.
