मुंबई : अनुसूचित जातींच्या १३ टक्के आरक्षणाचे ‘अ, ब, क, ड’ अशा पद्धतीने उपवर्गीकरण करण्याची मागणी प्रलंबित राहिल्याच्या निषेधार्थ मातंग समाजाच्या वतीने मंगळवारी मुंबईत आंदोलन करण्यात आले.
या आंदोलनासाठी आझाद मैदानाची परवानगी देण्यात आली होती. मात्र, पोलिसांना गाफील ठेवत आंदोलकांनी सीएसएमटी स्थानक, मुंबई महानगरपालिका मुख्यालय आणि परिसरातील रस्त्यांवर ठिय्या देत वाहतूक रोखली. त्यामुळे या भागात मोठी वाहतूक कोंडी निर्माण झाली असून पोलीस यंत्रणेची धावपळ उडाली आहे.
आंदोलकांनी सीएसएमटी परिसरासह मुंबई महानगरपालिका मुख्यालय आणि सेल्फी पॉईंट परिसरात मोठ्या संख्येने गर्दी केली. काही आंदोलक रस्त्यावरच झोपून राहिले, तर काही आंदोलक बेस्टच्या बसवर चढल्याचेही दिसून आले. त्यामुळे सीएसएमटी परिसरातील वाहतूक पूर्णपणे विस्कळीत झाली आहे. मंत्रालयाकडे जाणाऱ्या मार्गावरही वाहतूक ठप्प होण्याची शक्यता निर्माण झाली आहे. परिस्थिती नियंत्रणात आणण्यासाठी पोलिसांकडून आंदोलकांना आझाद मैदानात जाण्याची विनंती करण्यात येत आहे. मात्र, आंदोलक आपल्या मागणीवर ठाम असून रस्त्यावरून हटण्यास तयार नसल्याचे चित्र आहे.
अनुसूचित जातींच्या आरक्षणाच्या उपवर्गीकरणाबाबत शासन निर्णय होईपर्यंत मुंबई सोडणार नसल्याची भूमिका मातंग समाजाच्या आंदोलकांनी घेतली आहे. त्यामुळे आंदोलन अधिक तीव्र होण्याची शक्यता असून पोलिसांसमोर कायदा व सुव्यवस्था राखण्याचे आव्हान निर्माण झाले आहे. आंदोलकांची समजूत काढण्याचे प्रयत्न पोलिसांकडून सुरू आहेत.
दरम्यान, मातंग समाजाच्या मोर्चात सहभागी होण्यापूर्वीच माजी आमदार रमेश कदम यांना पोलिसांनी स्थानबद्ध केले. कस्तुरबा मार्ग पोलिसांनी सकाळी सात वाजता ही कारवाई केली. महाराष्ट्र शासनाच्या आदेशानुसार कायदा व सुव्यवस्थेचा प्रश्न निर्माण होऊ नये, यासाठी त्यांना मोर्चात सहभागी होण्याची परवानगी नाकारण्यात आल्याची माहिती पोलिसांनी दिली. या कारवाईमुळे मातंग समाजातील कार्यकर्त्यांमध्ये नाराजी निर्माण झाली आहे. आरक्षणाच्या उपवर्गीकरणाचा शासन निर्णय होईपर्यंत आंदोलन सुरू ठेवण्याची भूमिका आंदोलकांनी घेतल्याने आता प्रशासनाकडून परिस्थिती कशी हाताळली जाते, याकडे सर्वांचे लक्ष लागले आहे.
