दिवा : ठाणे महापालिका क्षेत्रातील दिवा शहरात मंगळवारी मध्यरात्री लागलेल्या भीषण आगीत रस्त्यालगत पार्क केलेली एक ऑटोरिक्षा आणि तब्बल २२ दुचाकी वाहने जळून पूर्णपणे खाक झाल्याची धक्कादायक घटना घडली. साबेगाव परिसरातील आदर्श विद्यालयासमोर, दिवा नॅशनल इंग्लिश स्कूलच्या हॉलमागे मंगळवार, दि. १३ ऑक्टोबर रोजी पहाटे २ वाजून २ मिनिटांच्या सुमारास ही आग भडकली. आगीने क्षणातच रौद्ररूप धारण करून एकापाठोपाठ उभ्या असलेल्या २३ वाहनांना आपल्या कवेत घेतले. या घटनेची माहिती मिळताच मुंब्रा पोलीस ठाण्याचे कर्मचारी आणि अग्निशमन दलाच्या जवानांनी तात्काळ फायर व रेस्क्यू वाहनांसह घटनास्थळी धाव घेतली. स्थानिक नागरिकांच्या मदतीने अग्निशमन दलाने शर्थीचे प्रयत्न करत पहाटे ३ वाजून १६ मिनिटांच्या सुमारास आगीवर पूर्णपणे नियंत्रण मिळवले; मात्र तोपर्यंत सर्वच्या सर्व २३ वाहने जळून कोळसा झाली होती. सुदैवाने या दुर्घटनेत कोणतीही जीवितहानी झाली नसली, तरी लाखो रुपयांचे अतोनात आर्थिक नुकसान झाले आहे.
या आगीत रमेश खोचडे, समीर जाधव, राकेश टिचकुले, संदीप शर्मा, सुयोग शिरगावकर, पूनम गुप्ता, बाळकृष्ण कदम, केशव शिगवण, महेश पितळे, विशांत सकपाळ, सतीश करकरे, विवेक चौहान, शैलेश लोढत आणि लक्ष्मण शिंदे यांच्या दुचाकींसह एका अज्ञात मालकाची ऑटोरिक्षा (एमएच ०४ केएक्स ६२१६) आणि अन्य आठ अज्ञात वाहने पूर्णपणे जळून नष्ट झाली आहेत. मध्यरात्रीच्या सुमारास एकाच वेळी इतक्या मोठ्या प्रमाणावर वाहनांना आग लागल्यामुळे परिसरात तीव्र संताप व भीतीचे वातावरण पसरले आहे. ही आग नेमकी शॉर्टसर्किटसारख्या तांत्रिक बिघाडामुळे लागली की कोणी अज्ञात इसमाने जाणीवपूर्वक घातपात घडवून आणला, या दोन्ही शक्यतांच्या आधारे मुंब्रा पोलिसांनी कसून तपास सुरू केला आहे. घटनास्थळाची सखोल पाहणी करून आगीचे नेमके कारण शोधण्याचे काम पोलिसांकडून वेगाने केले जात आहे. दरम्यान, दिवा परिसरातील अनेक इमारतींमध्ये पुरेशा पार्किंग सुविधेचा गंभीर अभाव असल्याने नागरिकांना नाईलाजाने आपली वाहने रस्त्यावर पार्क करावी लागत असून, या अग्नितांडवामुळे दिव्यातील पार्किंग आणि वाहनांच्या सुरक्षेचा प्रश्न पुन्हा एकदा ऐरणीवर आला आहे.
