संगमेश्वर : संगमेश्वर तालुक्यातील कडवई गावचे माजी सरपंच, शिवसेनेचे विभागप्रमुख तथा पंचक्रोशी शिक्षण संस्थेचे सचिव वसंत उजगावकर यांचे सोमवारी सायंकाळी साडेचार वाजण्याच्या सुमारास हृदयविकाराच्या तीव्र झटक्याने निधन झाले. त्यांच्या आकस्मिक निधनाने कडवईसह पंचक्रोशी परिसरावर शोककळा पसरली असून सामाजिक व राजकीय क्षेत्रातून हळहळ व्यक्त होत आहे.
वसंत उजगावकर यांनी सामाजिक कार्याला नेहमीच प्राधान्य देत सर्वसामान्यांशी जिव्हाळ्याचे संबंध निर्माण केले होते. ‘जनसेवा हीच खरी ईश्वरसेवा’ या भावनेतून काम करताना गावातील तसेच पंचक्रोशीतील नागरिकांच्या अडचणीच्या काळात ते मदतीसाठी तत्परतेने धावून जात असत. कोणत्याही कुटुंबावर संकट आले किंवा सामाजिक उपक्रमासाठी मदतीची गरज भासली, तर ते सक्रियपणे सहभागी होत असत. पदापेक्षा माणुसकीला महत्त्व देणारा आणि प्रत्येकाच्या सुख-दुःखात सहभागी होणारा व्यक्ती म्हणून त्यांची परिसरात ओळख होती.
काही दिवसांपूर्वीच त्यांच्या पुढाकारातून कडवई येथे शिवसेना शाखेचा शुभारंभ करण्यात आला होता. पक्षीय कार्यासोबतच सर्वसामान्यांच्या प्रश्नांसाठी काम करण्याचा तसेच विविध सामाजिक उपक्रम राबविण्याचा संकल्प यावेळी करण्यात आला होता. त्यांच्या जनसंपर्काची आणि सामाजिक कार्याची पक्षातील वरिष्ठ पदाधिकाऱ्यांनीही दखल घेतली होती.
वसंत उजगावकर यांच्या अचानक निधनाने कडवई परिसरातील सामाजिक, शैक्षणिक आणि राजकीय क्षेत्रात मोठी पोकळी निर्माण झाली आहे. त्यांच्या मनमिळावू स्वभावाची, मदतीसाठी सदैव पुढे येण्याची वृत्ती आणि सामाजिक बांधिलकीची आठवण ग्रामस्थांच्या मनात कायम राहणार आहे. त्यांच्या निधनाने ‘आपला माणूस’ हरपल्याची भावना व्यक्त करत ग्रामस्थ, मित्रपरिवार आणि विविध क्षेत्रातील मान्यवरांनी त्यांना भावपूर्ण श्रद्धांजली अर्पण केली.
