देवरुख : शासनाच्या ‘आपले सरकार’ पोर्टलवरील ऑनलाइन देयक सेवेमध्ये उत्कृष्ट कामगिरी बजावत रत्नागिरी पोलीस दलातील देवरुख पोलीस ठाण्याचे पोलीस हवालदार सागर विजय मुरुडकर (ब.नं. ३२४२) यांनी संपूर्ण महाराष्ट्रात प्रथम क्रमांक मिळविला आहे. त्यांच्या या उल्लेखनीय कामगिरीची दखल घेत रत्नागिरीचे पोलीस अधीक्षक नितीन बगाटे यांच्या हस्ते त्यांना विशेष प्रशस्तीपत्र देऊन गौरविण्यात आले.
शासकीय सेवा नागरिकांना जलद, सुलभ आणि पारदर्शक पद्धतीने उपलब्ध करून देण्यासाठी ‘आपले सरकार’ पोर्टलचा वापर केला जातो. या ऑनलाइन देयक सेवेत मुरुडकर यांनी प्रभावीपणे काम करत नागरिकांना सेवा वेळेत मिळण्यासाठी विशेष प्रयत्न केले. त्यांच्या कर्तव्यनिष्ठा, कार्यतत्परता आणि सातत्यपूर्ण प्रयत्नांमुळे राज्यस्तरावर ही उल्लेखनीय कामगिरी नोंदविण्यात आली आहे.
पोलीस अधीक्षक नितीन बगाटे यांनी प्रशस्तीपत्राच्या माध्यमातून सागर मुरुडकर यांच्या उत्कृष्ट सेवाभावाचे कौतुक केले. भविष्यातही त्यांच्या हातून अशाच प्रकारे उत्कृष्ट कामगिरी घडत राहावी आणि रत्नागिरी पोलीस दलाचे नाव अधिक उज्ज्वल व्हावे, अशा शुभेच्छाही त्यांनी व्यक्त केल्या.
सागर मुरुडकर यांच्या राज्यातील या अव्वल कामगिरीबद्दल देवरुख पोलीस ठाण्याचे पोलीस निरीक्षक यादव यांच्यासह रत्नागिरी पोलीस दलातील अधिकारी व कर्मचाऱ्यांनी त्यांचे अभिनंदन केले. त्यांच्या या यशाबद्दल देवरुख परिसरातून तसेच नागरिकांकडूनही कौतुक व्यक्त होत आहे.
