चिपळूण: गेल्या दहा दिवसांपासून भक्ती, उत्साह आणि मांगल्याच्या वातावरणात रममाण झालेल्या चिपळूण शहरात अनंत चतुर्दशीच्या दिवशी लाडक्या गणरायाला अत्यंत भावूक वातावरणात निरोप देण्यात आला. ढोल-ताशांचा दणदणाट, पारंपरिक वाद्यांचा गजर आणि गुलालाची मुक्त उधळण करत शहरातील १४ सार्वजनिक गणेशोत्सव मंडळांसह तब्बल ३ हजार ९६५ घरगुती गणेशमूर्तींचे विसर्जन करण्यात आले. ‘गणपती बाप्पा मोरया, पुढच्या वर्षी लवकर या’ या गगनभेदी जयघोषाने संपूर्ण चिपळूण शहर दुमदुमून निघाले होते.
विसर्जनानिमित्त शहरातील वाशिष्ठी आणि शिव नदीकिनारी गणेशभक्तांचा मोठा जनसागर उसळला होता. बाजारपूल, खेंड बावशेवाडी नदी, बहादूरशेख नाक्याजवळील वाशिष्ठी नदी, पाग येथील शिव नदीकिनारा तसेच गांधारेश्वर येथील प्रमुख विसर्जन घाटांवर सायंकाळच्या सुमारास भक्तांची प्रचंड गर्दी झाली होती. विसर्जनस्थळांवर पारंपरिक पद्धतीने विधिवत पूजा व आरत्या करण्यात आल्या; विशेषतः महिला वर्गाने भावपूर्ण डोळ्यांनी लाडक्या बाप्पाची आरती ओवाळून निरोप दिला.
सार्वजनिक गणेशोत्सव मंडळांच्या वतीने पारंपरिक वाद्यवृंदांच्या तालावर भव्य आणि शिस्तबद्ध मिरवणुका काढण्यात आल्या होत्या. मिरवणुकीत सहभागी झालेल्या तरुणाईचा उत्साह आणि भक्तांचा जयघोष यामुळे नदीकाठचा परिसर पूर्णपणे भक्तिरसात न्हाऊन निघाला होता. दहा दिवसांच्या चैतन्यमय आणि आनंददायी उत्सवाची सांगता करताना प्रत्येक भक्ताच्या मनात निरोपाचे दुःख आणि आगामी वर्षातील आगमनाची आतुरता स्पष्टपणे जाणवत होती.
