लांजा तालुक्यात १३ हजार ५८८ बाप्पांना भावपूर्ण निरोप

लांजा (अरबाज नेवरेकर) : लांजा तालुक्यात यंदाच्या गणेशोत्सवाची सांगता भक्तिमय आणि भावपूर्ण वातावरणात झाली. तालुक्यातील तब्बल १३ हजार ५८८ गणेशमूर्तींचे विविध विसर्जनस्थळी भक्तिभावाने विसर्जन करण्यात आले. ‘गणपती बाप्पा मोरया, पुढच्या वर्षी लवकर या’च्या जयघोषाने नदी, तलाव आणि विसर्जनस्थळांचा परिसर दुमदुमून गेला.

तालुक्यातील विविध गावांमध्ये घरगुती तसेच सार्वजनिक गणेशमूर्तींच्या विसर्जनासाठी भाविकांनी मोठी गर्दी केली होती. ढोल-ताशांचा गजर, गणरायाचा जयघोष आणि भक्तिमय वातावरणात मिरवणुका काढण्यात आल्या. अनेक भाविकांनी आरती करून आणि पुढील वर्षी लवकर आगमनाचे साकडे घालत लाडक्या बाप्पाला भावपूर्ण निरोप दिला. बाप्पाला निरोप देताना काही ठिकाणी भाविकांच्या डोळ्यांत अश्रू तरळले, तर पुढील वर्षी पुन्हा गणरायाचे आगमन होणार असल्याचा उत्साहही सर्वांच्या चेहऱ्यावर दिसत होता.

गणेशमूर्तींचे विसर्जन सुरळीत आणि सुरक्षितपणे पार पडावे यासाठी नगरपंचायत, ग्रामपंचायती, प्रशासन तसेच पोलीस यंत्रणेकडून आवश्यक नियोजन करण्यात आले होते. विविध विसर्जनस्थळी वाहतूक नियंत्रण, सुरक्षितता आणि स्वच्छतेच्या दृष्टीने आवश्यक व्यवस्था करण्यात आली होती. प्रशासनाच्या नियोजनाला नागरिकांनीही सहकार्य केल्याने विसर्जन प्रक्रिया शांततेत पार पडली.

भक्तिभाव, उत्साह आणि ‘बाप्पा मोरया’च्या जयघोषात लांजा तालुक्यातील १३ हजार ५८८ गणरायांना भावपूर्ण निरोप देण्यात आला. गणेशोत्सवाच्या निमित्ताने निर्माण झालेले भक्तिमय वातावरण विसर्जनानंतरही नागरिकांच्या मनात कायम राहिले.