लखनौ : भारतीय सैन्यदलातील शूर जवान आणि त्यांच्या लढाऊ श्वानांमधील पराक्रमाचे, निष्ठेचे बंध केवळ जमिनीपुरते मर्यादित नसून ते थेट अथांग आकाशालाही कवेत घेणारे आहेत, याची सुवर्ण अक्षरांनी नोंद घेणारी एक अद्भूत आणि थरारक घटना समोर आली आहे. भारतीय लष्कराच्या लखनौ मुख्यालय असलेल्या सेंट्रल कमांड म्हणजेच ‘सूर्या कमांड’च्या एका जांबाज पॅराट्रूपरने मध्य भारतातील बेहट ड्रॉप झोनमध्ये संपूर्ण लढाऊ साहित्यासह एका श्वान आणि त्याच्या हँडलरसोबत यशस्वी टँडम पॅराशूट जंप मारून नवा इतिहास रचला आहे. आकाशात उंचावर पॅराशूट उलगडल्यानंतर जवानासह लष्कराचा हा निष्ठावंत श्वान हवेत तरंगतानाचे दृश्य पाहून संपूर्ण देशाचा ऊर अभिमानाने भरून आला असून, या अंगावर काटा आणणाऱ्या हवाई सरावाचा व्हिडिओ सध्या जगभरात प्रचंड व्हायरल होत आहे.
अचूकता, असीम धाडस आणि सर्वोच्च युद्धसज्जतेचे अद्वितीय दर्शन घडवत पार पडलेली ही मोहीम श्वान आणि त्याच्या हँडलरने एकत्र पूर्ण केलेली देशातील पहिलीच टँडम जंप असल्याचे सूर्या कमांडने अधिकृतपणे स्पष्ट केले आहे. यापूर्वी यशस्वीरीत्या पार पडलेल्या फ्री-फॉल जंपचाच हा पुढील प्रगत टप्पा मानला जात असून, जवान आणि या मूक वीरांमधील अटूट विश्वास आणि सांघिक समन्वयाचा हा एक जागतिक वस्तुपाठ ठरला आहे. उत्तर आणि मध्य भारताच्या विस्तीर्ण सीमारेषेचे रक्षण करणाऱ्या सूर्या कमांडच्या अखत्यारीत पार पडलेल्या या ऐतिहासिक उड्डाणामुळे आगामी काळात अत्यंत दुर्गम, संकटांनी वेढलेल्या आणि शत्रूच्या थेट प्रभावाखालील भागांमध्ये लष्करी श्वानांचा वापर वेगाने वाढवण्याचा मार्ग अधिक सुलभ झाला आहे.
भारतीय लष्कराच्या पॅरा स्पेशल फोर्सेसकडून वर्षानुवर्षे शोध मोहिमा आणि दहशतवादविरोधी धडक कारवायांमध्ये अशा प्रशिक्षित श्वानांचा प्रभावी वापर केला जात आहे. अत्यंत कठीण भौगोलिक परिस्थितीत शत्रूचा अचूक माग काढणे, बॉम्ब, शस्त्रसाठा आणि लपलेल्या दहशतवाद्यांचा गंधाच्या आधारे शोध घेणे यात हे लढाऊ श्वान निपुण असतात. जवान एखाद्या जीवघेण्या इमारतीत किंवा संशयित अड्ड्यावर पाऊल ठेवण्यापूर्वी हे श्वान पुढे जाऊन संपूर्ण परिसराची तपासणी करतात आणि शत्रूच्या हद्दीत थेट घुसखोरी करताना जवानांचे रक्षक बनून उभे ठाकतात. आता थेट विमानातून आकाशात झेपावून जमिनीवर अचूक कारवाई करण्याचे हे आधुनिक कौशल्य सिद्ध झाल्याने, भारतीय लष्कराच्या युद्धसज्जतेचा आणि या मुक्या योद्ध्यांच्या अतुलनीय शौर्याचा तिरंगा अभिमानाने अधिकच उंचावला आहे.
