फ्रेंड्स ग्रुपचा २१ वर्षांचा दीपोत्सवाचा उपक्रम; महाराष्ट्रात तृतीय तर कोकणात प्रथम क्रमांकाचा दीपोत्सव म्हणून विशेष ओळख
लांजा (अरबाज नेवरेकर): दीपावलीच्या सणानिमित्त प्रकाशाचा उत्सव अधिक भव्य स्वरूपात साजरा करण्यासाठी फ्रेंड्स ग्रुप, लांजा यांच्या वतीने भव्य लांजा दीपोत्सव २०२६ चे आयोजन करण्यात आले आहे. रविवार, ८ नोव्हेंबर रोजी सायंकाळी ८ वाजता न्यू इंग्लिश स्कूल, लांजा येथील भव्य पटांगणात हा सोहळा पार पडणार आहे.
यंदा या दीपोत्सवाचे २१ वे वर्ष असून, तब्बल २१ हजार दिवे प्रज्वलित करून लांजा नगरी प्रकाशमय करण्याचे नियोजन करण्यात आले आहे. महाराष्ट्रातील तृतीय क्रमांकाचा आणि कोकणातील प्रथम क्रमांकाचा भव्य दीपोत्सव अशी या उपक्रमाची विशेष ओळख पोस्टरच्या माध्यमातून करण्यात आली आहे.
या वर्षीच्या दीपोत्सवाचे आणखी एक आकर्षण म्हणजे भव्य फटाक्यांची आतषबाजी. हजारो दिव्यांच्या प्रकाशासोबतच रंगीबेरंगी आतषबाजीमुळे दीपोत्सवाचा उत्साह अधिकच वाढणार आहे. गेल्या २१ वर्षांपासून फ्रेंड्स ग्रुपने जपलेला हा उपक्रम यंदाही विशेष स्वरूपात साकारण्यात येणार आहे.तसेच यंदा मराठी सुरेल गीतांचा स्वरभैरवी कार्यक्रमाचे आयोजित करण्यात येणार आहे.
या कार्यक्रमाला आमदार किरण सामंत, तहसीलदार प्रियांका ढोले,लांजा पोलीस निरीक्षक निलकंठ बगळे, उप पोलीस निरीक्षक देवकन्या मैदाड,नगराध्यक्षा सावली कुरूप, न्यू एज्यूकेशन सोसायटी लांजाचे अध्यक्ष जयवंतभाऊ शेट्ये, गुरुप्रसाद देसाई, विजय बेर्डे सर,लांजा नगरपंचायतीचे सर्व नगरसेवक,उपस्थित राहणार आहेत.
लांजा शहरासह तालुक्यातील नागरिकांनी या भव्य दीपोत्सवात सहभागी होऊन २१ हजार दिव्यांच्या प्रकाशसोहळ्याचा आणि फटाक्यांच्या आतषबाजीचा आनंद घ्यावा, असे आवाहन फ्रेंड्स ग्रुप, लांजा यांच्या वतीने करण्यात आले आहे.
