रत्नागिरी : रत्नागिरी शहरातील मिरकरवाडा जेटी क्रमांक २ येथील पानटपरीसमोर किरकोळ कारणावरून पानटपरी चालक आणि त्याच्या भावाला मारहाण केल्याची घटना ३१ ऑक्टोबर रोजी मध्यरात्री १२.१० वाजण्याच्या सुमारास घडली. या मारहाणीत दोघे भाऊ जखमी झाले असून, दुकानातील साहित्याची तोडफोड करून नुकसान करण्यात आले. याप्रकरणी रत्नागिरी शहर पोलीस ठाण्यात एका संशयिताविरुद्ध गुन्हा दाखल करण्यात आला आहे.
वसी अब्दुल रेहमान डोना (वय १९, रा. मालवणकर कंपाऊंड, चर्च रोड, बाजारपेठ, रत्नागिरी) यांनी याबाबत फिर्याद दिली आहे. पोलिसांनी दिलेल्या माहितीनुसार, समद खत्री (पूर्ण नाव माहीत नाही, रा. मिरकरवाडा, रत्नागिरी) याने फिर्यादी काम करत असलेल्या पानटपरीच्या ठिकाणी जाऊन कोणतेही कारण नसताना वसी आणि त्यांचा भाऊ नफिज अब्दुल रेहमान डोना (वय २२) यांना हाताच्या थापटाने पाठीवर व मानेवर मारहाण केली.
त्यानंतर संशयिताने खिशातून चावी काढून ती नफिज यांच्या उजव्या कानावर मारली. यामध्ये त्यांच्या कानाला दुखापत होऊन रक्तस्राव झाला. तसेच पाण्याच्या बाटल्यांची केस उचलून ती नफिज यांच्या डोक्यावर मारल्याचे फिर्यादीत नमूद करण्यात आले आहे. यावेळी संशयिताने पानटपरीतील साहित्याची तोडफोड करून नुकसान केले. तसेच दोन्ही भावांना शिवीगाळ करत घरात घुसून मारण्याची धमकी दिल्याचेही फिर्यादीत म्हटले आहे.
या प्रकरणी ३१ ऑक्टोबर रोजी पहाटे ४.०५ वाजता रत्नागिरी शहर पोलीस ठाण्यात गुन्हा रजिस्टर क्रमांक ४५३/२०२६ अन्वये भारतीय न्याय संहिता २०२३ च्या कलम ३५१(२), ३२४(२), ११८(१), ११५(२) आणि ३५२ नुसार गुन्हा दाखल करण्यात आला आहे. या प्रकरणातील संशयिताला अद्याप अटक झालेली नाही.
