रत्नागिरी: शहरातील मध्यवर्ती ठिकाण असलेल्या सुभाष रोड वरची आळी परिसरातील एका ६५ वर्षीय वृद्धाने राहत्या घरी गळफास लावून आत्महत्या केल्याची धक्कादायक घटना समोर आली आहे. रविलाल देवजी पटेल (वय ६५ वर्षे, रा. घर नं. २३२३ अ, सुभाष रोड वरची आळी, रत्नागिरी) असे मृत वृद्धाचे नाव असून, या घटनेमुळे परिसरात हळहळ व्यक्त केली जात आहे.
मिळालेल्या माहितीनुसार, २४ सप्टेंबर २०२६ रोजी दुपारी पावणे एक वाजण्याच्या सुमारास रविलाल पटेल यांनी राहत्या घरातील छताच्या लाकडी वाशाला पिवळ्या रंगाची नायलॉन दोरी बांधली. त्यानंतर गळ्याभोवती काळ्या रंगाचा नॅपकिन गुंडाळून गळफास घेत आपली जीवनयात्रा संपवली. हा प्रकार निदर्शनास येताच नातेवाइकांनी व स्थानिक नागरिकांनी तातडीने धाव घेऊन त्यांना खाली उतरवले आणि उपचारासाठी जिल्हा शासकीय रुग्णालय (सिव्हिल हॉस्पिटल) येथे दाखल केले.
मात्र, रुग्णालयात दाखल करण्यापूर्वीच त्यांचा मृत्यू झाला असल्याचे वैद्यकीय अधिकाऱ्यांनी तपासून घोषित केले. या घटनेची माहिती मिळताच शहर पोलीस ठाण्याच्या पथकाने रुग्णालयात पोहोचून पंचनामा केला. वृद्धाने हे टोकाचे पाऊल नेमके कोणत्या कारणातून उचलले, याचे कारण अद्याप समजू शकलेले नाही. याप्रकरणी रत्नागिरी शहर पोलीस ठाण्यात भारतीय नागरिक सुरक्षा संहिता (BNSS) २०२३ च्या कलम १९४ अन्वये अकस्मात मृत्यूची नोंद करण्यात आली असून, शहर पोलीस या घटनेचा पुढील सखोल तपास करत आहेत.
