दाभोळ एसटी स्थानकाजवळ संशयास्पदरीत्या वावरणारा तरुण ताब्यात

दाभोळ : दाभोळ एसटी स्थानक परिसरात रात्रीच्या वेळी स्वतःचे अस्तित्व लपवून संशयास्पदरीत्या वावरणाऱ्या २३ वर्षीय तरुणावर दाभोळ सागरी पोलिस ठाण्यात गुन्हा दाखल करण्यात आला आहे. ही कारवाई २० सप्टेंबर रोजी रात्री करण्यात आली.

पोलिसांनी दिलेल्या माहितीनुसार, राजेशकुमार योगेंद्र प्रसाद गौतम (वय २३, रा. फुलवारिया, तहसील गोपाळपूर, जि. संत कबीर नगर, उत्तर प्रदेश) हा २० सप्टेंबर रोजी रात्री ९.४५ वाजण्याच्या सुमारास दाभोळ एसटी स्थानकातील एका टपरीच्या मागील बाजूस संशयास्पदरीत्या आढळून आला. सूर्यास्त ते सूर्योदयाच्या दरम्यान चोरी करण्याच्या उद्देशाने त्याने आपले अस्तित्व लपविल्याचा संशय पोलिसांना आल्याने त्याची चौकशी करण्यात आली.

यावेळी पोलिसांनी त्याला तेथे उपस्थित राहण्याचे कारण तसेच नाव व गावाबाबत विचारणा केली असता त्याने उडवाउडवीची उत्तरे दिल्याचे फिर्यादीत नमूद करण्यात आले आहे. याप्रकरणी पोलिस शिपाई दैवत दिलीप राणे यांनी फिर्याद दिली असून, दाभोळ सागरी पोलिस ठाण्यात गुन्हा रजिस्टर क्रमांक ३६/२०२६ अन्वये महाराष्ट्र पोलिस कायदा कलम १२२(अ) प्रमाणे गुन्हा दाखल करण्यात आला आहे. या प्रकरणाचा पुढील तपास दाभोळ सागरी पोलिस करीत आहेत.