रत्नागिरी : रत्नागिरी शहरानजीक असलेल्या उद्यमनगर परिसरातील ‘तारा वैभव रेसिडेन्सि’ या उच्चभ्रू इमारतीमध्ये बुधवारी पहाटेच्या सुमारास जबरी चोरीची थरारक घटना उघडकीस आली आहे. इमारतीमधील दोन बंद फ्लॅटचे कुलूप तोडून अज्ञात चोरट्यांनी कपाटातील सोन्या-चांदीचे दागिने आणि रोख रक्कमेवर डल्ला मारला. इतकेच नव्हे तर चोरी करून पळून जात असताना अडवणाऱ्या सुरक्षारक्षकावर कुऱ्हाडीने जीवघेणा हल्ला चढवत चोरटे पसार झाले. या दुहेरी कृत्यामुळे उद्यमनगर परिसरासह संपूर्ण शहर परिसरात तीव्र खळबळ उडाली असून नागरिकांमध्ये भीतीचे वातावरण पसरले आहे.
मिळालेल्या माहितीनुसार, पहाटे साधारण साडेतीन वाजण्याच्या सुमारास अंधाराचा फायदा घेत दोन अज्ञात चोरट्यांनी तारा वैभव रेसिडेन्सिच्या आवारात प्रवेश केला. इमारतीमधील बंद असलेल्या दोन फ्लॅटची पाहणी करून त्यांनी कटर अथवा लोखंडी हत्यारांच्या साहाय्याने मुख्य दरवाजांचे कुलूप तोडले. चोरट्यांनी दोन्ही फ्लॅटमधील कपाटांची उचकापाचक करत घरातील सोन्या-नाण्याचे दागिने आणि रोकड असा मोठा ऐवज लंपास केला. चोरी आटोपून दोघेही चोरटे इमारतीच्या आवारातून बाहेर पडण्याच्या तयारीत असतानाच, नियमित गस्तीवर असलेल्या सतर्क सुरक्षारक्षकाची नजर त्यांच्या हालचालींवर पडली.
पहाटेच्या वेळी अनोळखी व्यक्तींना संशयास्पद स्थितीत पाहून सुरक्षारक्षकाने त्यांना हटकले आणि त्यांची चौकशी करण्याचा प्रयत्न केला. आपण रंगेहाथ पकडले जात असल्याची जाणीव होताच चोरट्यांनी प्रतिकार करत हातातील हत्यारे उपसली. त्यातील एका चोरट्याने थेट कुऱ्हाडीने सुरक्षारक्षकावर प्राणघातक वार करण्याचा प्रयत्न केला. समोरून अचानक झालेल्या या हिंसक हल्ल्याने सुरक्षारक्षक भयभीत झाला; मात्र प्रसंगावधान राखत त्याने स्वतःचा बचाव करण्यासाठी जवळच असलेल्या सुरक्षा केबिनकडे धाव घेतली आणि आतून कडी लावून घेतली.
सुरक्षारक्षक केबिनमध्ये सुरक्षित होताच चोरट्यांनी कोणताही विलंब न लावता रात्रीच्या अंधाराचा फायदा घेऊन तिथून पोबारा केला. सकाळी हा प्रकार समोर आल्यानंतर इमारतीमधील रहिवासी भयभीत झाले. या घटनेची माहिती मिळताच शहर पोलीस ठाण्याचे पथक तातडीने घटनास्थळी दाखल झाले असून त्यांनी परिसराचा पंचनामा केला आहे. पोलिसांनी इमारतीसह आजूबाजूच्या परिसरातील सीसीटीव्ही कॅमेऱ्यांचे फुटेज ताब्यात घेऊन तपास चक्रांना गती दिली असून संशयितांच्या शोधासाठी विशेष पथके रवाना करण्यात आली आहेत. दरम्यान, या घटनेमुळे शहरातील वाढत्या गुन्हेगारीबाबत नागरिकांमधून तीव्र संताप व्यक्त होत असून शहरात रात्रीच्या वेळी पोलीस गस्त वाढवण्याची मागणी जोर धरत आहे.
