नदी-नाले कोरडे पडल्याने पिके सुकण्याच्या उंबरठ्यावर; ओल्या दुष्काळानंतर आता सुक्या दुष्काळाची भीषण सावली
पाचल / काजिर्डा (अंकुश पोटले): राजापूर तालुक्यातील पाचल पूर्व परिसरातील अनेक गावांमधील हातातोंडाशी आलेली भातशेती निसर्गाच्या लहरीपणामुळे पूर्णपणे संकटात सापडली असून, ऐन भरात आलेली पिके कापणीपूर्वीच सुकून जाण्याच्या मार्गावर पोहोचली आहेत. पिकाला दाणा भरण्याच्या अत्यंत निर्णायक टप्प्यावरच पावसाने दडी मारल्याने वर्षभराच्या कष्टाचे पीक शेतकऱ्याच्या हाती लागेल की नाही, याबाबत आता तीव्र साशंकता आणि घोर निराशा पसरली आहे.
पावसाच्या तीव्र टंचाईमुळे बाहेर पडलेली भाताची लोंब (केसर) करपू लागली असून, त्यावर पिकाचा आवश्यक तो अवसर चढत नसल्याची विदारक परिस्थिती शेतांमध्ये पाहायला मिळत आहे. मध्यंतरी एखाद्या पाहुण्यासारखी केवळ एका दिवसापुरती हजेरी लावून पावसाने पुन्हा काढता पाय घेतल्याने शेतकरी वर्गाची चिंता अधिकच वाढली आहे. हवामानात पुन्हा पावसाची चिन्हे दिसत नसून, पाण्याचा साठा शिल्लक न राहिल्याने परिसरातील नदी-व्हाळ पूर्णपणे सुकून कोरडेठाक पडले आहेत.
निसर्गाच्या या अस्मानी संकटामुळे यंदा शेतकऱ्याच्या तोंडाशी आलेला घास हिरावून घेतला जाऊन हातात केवळ माती पडणार, अशीच भयानक परिस्थिती निर्माण झाली आहे. सुरुवातीला अतिवृष्टीचा फटका सहन केल्यानंतर आता थेट सुक्या दुष्काळाची परिस्थिती ओढवल्याने बळीराजा दोन्ही बाजूंनी दुतर्फा होरपळून निघाला आहे. नद्या-नाले आटल्याने आणि पाऊस गायब झाल्याने अशा कठीण समयी नेमकं काय करावं, या विवंचनेत संपूर्ण पाचल परिसरातील शेतकरी वर्ग सापडला आहे.
