पाचल बीटची शैक्षणिक गुणवत्तेत तालुक्यात भरारी: प्रभागस्तरीय शिक्षण परिषदेत पाचल बौद्धवाडी व रायपाटण नं. १ शाळांचे कौतुक

पाचल (तुषार पाचलकर): राजापूर तालुक्यातील पाचल बौद्धवाडी आणि रायपाटण नं. १ या शाळांची शैक्षणिक गुणवत्ता अत्यंत कौतुकास्पद असून, पाचल बीटने शैक्षणिक गुणवत्तेच्या क्षेत्रात राजापूर तालुक्यात मोठी आघाडी घेतली आहे, असे गौरवोद्गार राजापूर पंचायत समितीचे गटशिक्षणाधिकारी उत्तम भोसले यांनी काढले. पाचल येथे आयोजित करण्यात आलेल्या प्रभागस्तरीय शिक्षण परिषदेत ते प्रमुख मार्गदर्शक म्हणून बोलत होते. राजापूर तालुका शिष्यवृत्ती अभियानाच्या माध्यमातून विद्यार्थ्यांची शैक्षणिक गुणवत्ता उंचावण्यासाठी विशेष प्रयत्न केले जात असल्याचे नमूद करत तालुक्यातील प्रत्येक विद्यार्थ्याची गुणवत्ता वाढविण्याची जबाबदारी शिक्षकांची असून ती नियोजनबद्ध पद्धतीने पार पाडणे आवश्यक असल्याचे त्यांनी स्पष्ट केले. तसेच शिष्यवृत्ती परीक्षेत यश मिळवण्यासाठी नियमित सराव, योग्य मार्गदर्शन आणि वैयक्तिक लक्ष देण्यावर भर देत शिक्षकांनी अध्यापन कौशल्यात सातत्याने सुधारणा करावी, असे आवाहनही त्यांनी केले. नव्याने नियुक्त झालेल्या शिक्षण सेवकांनी प्रामाणिक प्रयत्नांतून गुणवत्ता सिद्ध करावी आणि पाचल बीटमधील शाळांनी मिळविलेली ही आघाडी कायम ठेवावी, अशी अपेक्षाही त्यांनी व्यक्त केली. या परिषदेत धुळे सर यांनी ‘मूल्यवर्धन उजळणी’ विषयावर मार्गदर्शन करून अध्ययन प्रक्रिया परिणामकारक करण्यासाठी शिक्षकांच्या नियोजनाचे महत्त्व समजावून सांगितले, तर श्री. बिर्जे यांनी ‘स्पर्श’ विषयावर मार्गदर्शन करत शैक्षणिक बाबींचे महत्त्व अधोरेखित केले. तसेच परितकर मॅडम यांनी उत्कृष्ट नियोजन व प्रभावी मांडणीच्या जोरावर सादर केलेल्या आदर्श पाठाचे उपस्थितांनी विशेष कौतुक केले. शिष्यवृत्ती अभियानाची प्रभावी अंमलबजावणी, मूल्यवर्धन उजळणी आणि नावीन्यपूर्ण अध्यापन पद्धतींवर सखोल चर्चा घडवून आणत विद्यार्थ्यांच्या सर्वांगीण गुणवत्तावाढीचा संकल्प करणारी ही प्रभागस्तरीय शिक्षण परिषद अत्यंत उत्साहपूर्ण वातावरणात पार पडली.