राजन लाड/जैतापूर : आपल्या सिद्धहस्त लेखणीतून मालवणी बोलीभाषा सातासमुद्रापार पोहोचवणारे आणि मालवणी भाषेला जागतिक रंगभूमीच्या पटलावर मानाचे स्थान मिळवून देणारे राजापूर तालुक्यातील माडबन गावचे सुपुत्र, ज्येष्ठ नाटककार वस्त्रहरणकार कैलासवासी गंगाराम महादेव गवाणकर यांचा प्रथम स्मृतिदिन २८ ऑक्टोबर रोजी मालवणमध्ये विविध सांस्कृतिक उपक्रमांनी साजरा होत आहे. मालवणच्या मातीशी अतूट नाते जपणारे गवाणकर यांच्या स्मृतींना उजाळा देण्यासाठी या दिवशी त्यांच्या अजरामर लेखणीतून साकारलेल्या ‘अशा या दोघी’ या दोन अंकी नाटकाच्या विशेष प्रयोगाचे आयोजन करण्यात आले आहे.
मालवण येथील मामा वरेरकर नाट्यगृहात २८ ऑक्टोबर रोजी रंगणाऱ्या या सोहळ्यात सायंकाळी ठीक ६.३० वाजता मान्यवरांच्या उपस्थितीत कैलासवासी गंगाराम गवाणकर यांना भावपूर्ण आदरांजली वाहण्यात येणार असून त्यांच्या जीवनप्रवासाला व स्मृतींना उजाळा दिला जाणार आहे. त्यानंतर लगेचच ‘अशा या दोघी’ या नाटकाचा प्रयोग सुरू होईल. विशेष म्हणजे, रामानंद सागर यांच्या जगप्रसिद्ध ‘रामायण’ मालिकेत राजा दशरथाची अजरामर भूमिका साकारून घराघरांत पोहोचलेले ज्येष्ठ अभिनेते बाळ धुरी या कार्यक्रमासाठी प्रमुख पाहुणे म्हणून उपस्थित राहणार असून त्यांच्या उपस्थितीत गवाणकर यांच्या स्मृतींना वंदन करण्यात येणार आहे.
अष्टपैलू कलानिकेतन आयोजित आणि देऊळकर प्रॉडक्शन निर्मित या नाटकाची निर्मिती रोहिणी रवींद्र देऊळकर यांनी केली असून, कै. गवाणकरांचे परममित्र आणि ज्येष्ठ रंगकर्मी रवींद्र देवधर यांनी या नाटकाचे दिग्दर्शन केले आहे. या नाटकात राजेंद्र कदम, कुणाल आंगणे, संजीव शेडगे, योगिता सावंत, जितू तिरोडकर आणि मिनु देऊळकर हे मातब्बर कलाकार विविध भूमिका साकारणार आहेत. या नाटकाला प्रफुल्ल गोसावी यांचे संगीत लाभले असून, प्रकाश योजना धनश्री कुमठेकर यांनी केली आहे. रंगभूषा जितू तिरोडकर यांची तर निर्मिती सहाय्य सुजाता शेलटकर आणि सुनिल परुळेकर यांनी सांभाळले आहे.
कै. गंगाराम गवाणकर यांच्यावर जीवापाड प्रेम करणाऱ्या मालवण येथील कलाकार आणि मित्रपरिवाराने या संपूर्ण सोहळ्याचे आयोजन केले असून हा प्रयोग सर्व नाट्यप्रेमींसाठी विनामूल्य ठेवण्यात आला आहे. मालवणातील तसेच संपूर्ण कोकणातील रसिक प्रेक्षकांनी आणि नाट्यप्रेमींनी सायंकाळी ६.०० वाजल्यापासूनच मोठ्या संख्येने उपस्थित राहून कै. गवाणकरांच्या स्मृतींना अभिवादन करावे, असे भावूक आवाहन आयोजकांच्या वतीने करण्यात आले आहे.
