शरीराचं रक्त आटलं, दोन्ही किडन्यांनी साथ सोडली; तरी शेवटच्या श्वासापर्यंत लोकांचे प्राण वाचवणारी देवदूत हरपली
दापोली: दोन्ही किडन्या निकामी झालेल्या असताना आणि दर आठवड्याला असह्य अशा दोन डायलिसिसच्या वेदना अंगावर झेलत असतानाही केवळ जनसेवेचा वसा अखंड तेवत ठेवणाऱ्या दापोली तालुक्यातील एका ध्येयवेड्या आशासेविकेचा जीवनप्रवास अखेर अचानक संपला असून या दुर्दैवी घटनेने संपूर्ण गिम्हवणे गावावर आणि दापोली परिसरावर शोककळा पसरली आहे. दापोली तालुक्यातील गिम्हवणे परिसरातील अत्यंत कर्तव्यदक्ष आशासेविका साक्षी संदेश भैरमकर (वय ४४) असे अकाली निधन झालेल्या या देवदूताचे नाव असून त्यांच्या जाण्याने कुटुंब, सहकारी आशा भगिनी आणि संपूर्ण आरोग्य यंत्रणा अश्रूंमध्ये बुडाली आहे. मूळ रायगड जिल्ह्यातील महाड तालुक्यातील सुकन्या असलेल्या साक्षी यांनी गेल्या अनेक वर्षांपासून दापोलीच्या ग्रामीण भागात आरोग्य सेवेत स्वतःला झोकून दिले होते. भयानक कोरोना संकटाच्या काळात स्वतःच्या जिवाची पर्वा न करता दिलेली रुग्णसेवा असो, गावातील गरजू महिलांना ‘लाडकी बहीण’ योजनेचा हक्काचा लाभ मिळवून देण्यासाठी घेतलेली अफाट मेहनत असो वा सामाजिक कामातील तत्पर सहभाग; गावकऱ्यांच्या प्रत्येक सुख-दुःखात साक्षी ताई नेहमी सावलीसारख्या पुढे असायच्या.
गेल्या दोन वर्षांपासून त्यांना दोन्ही किडन्यांचा गंभीर आजार जडला होता आणि आठवड्यातून दोनदा डायलिसिस केल्यावरच शरीराला तात्पुरता दिलासा मिळायचा; मात्र या भीषण आजारालाही न जुमानता त्या अखंड कार्यरत राहिल्या. गुरुवारी, २२ ऑक्टोबर रोजी सकाळी त्यांनी बचत गटाच्या बैठकीत सक्रिय सहभाग घेत वही-रजिस्टर लिहिण्यापासून सर्व पूर्वतयारीची कामे नेटाने पूर्ण केली होती. दिवसभराचे काम आटोपून रात्री जेवणानंतर साडेदहाच्या सुमारास झोपायला जात असताना त्यांना अचानक उलट्या होऊन प्रकृती वेगाने खालावली. पती संदेश व मुलगा सिद्धेश यांनी त्यांना तातडीने दापोली शहर परिसरातील भागवत हॉस्पिटलमध्ये हलवले, तेथून डॉक्टरांच्या सल्ल्यानुसार पुढील उपचारांसाठी दापोली उपजिल्हा रुग्णालयात दाखल करण्यात आले; परंतु तपासणीअंती तेथील वैद्यकीय अधिकाऱ्यांनी त्यांना मृत घोषित केले. शुक्रवारच्या दिवशी शोकाकुल वातावरणात त्यांच्यावर अंत्यसंस्कार करण्यात आले असून यावेळी आरोग्य विभागाचे सर्व अधिकारी, कर्मचारी, राजकीय, सामाजिक व शैक्षणिक क्षेत्रातील मान्यवर मोठ्या संख्येने उपस्थित होते. आपल्या पश्चात पती, एक मुलगा, सासू, आई-वडील आणि दोन भाऊ-भावजय असा मोठा परिवार सोडून गेलेल्या या लढवय्या आशासेविकेच्या आकस्मिक विरहाने उपस्थितांच्या काळजाचा ठोका चुकला आणि सोबत काम करणाऱ्या महिला भगिनींच्या आक्रोशामुळे उपस्थित सर्वांचेच कंठ दाटून आले.
