दापोली: दापोली तालुक्यातील वणौशी तर्फ पंचनदी भिवबंदर कार्यक्षेत्रात प्रस्तावित असलेल्या २८०० मेगावॅट क्षमतेच्या अणुऊर्जा प्रकल्पाविरोधात स्थानिक ग्रामस्थांचा असंतोष उफाळून आला असून, या प्रकल्पाच्या संदर्भात प्रशासकीय पातळीवर कोणतीही कागदोपत्री कार्यवाही पुढे नेऊ नये, अशी आक्रमक मागणी वणौशी पंचनदी व दुमदेव अणुऊर्जा प्रकल्प विरोधी संघर्ष समितीने उपविभागीय अधिकाऱ्यांकडे एका निवेदनाद्वारे केली आहे. हा विनाशकारी प्रकल्प परिसरावर लादल्यास येथील निसर्गसंपन्न आंबा, काजू आणि सुपारीच्या बागा समूळ उद्ध्वस्त होतील तसेच मोठ्या प्रमाणावर पर्यावरणाचे प्रदूषण निर्माण होऊन स्थानिक जनजीवन धोक्यात येईल, अशी तीव्र भीती व्यक्त करत ग्रामस्थांनी प्रकल्पाला आरंभापासूनच ठाम विरोध दर्शवला आहे.
या जनभावनेचा आदर करत वणौशी तर्फ पंचनदी ग्रामपंचायतीने नुकत्याच पार पडलेल्या ग्रामसभेत प्रस्तावित अणुऊर्जा प्रकल्पाला कडाडून विरोध करणारा अधिकृत ठराव एकमुखाने मंजूर केला होता. याच ग्रामसभा ठरावाची प्रत जोडून ग्रामस्थांच्या शिष्टमंडळाने उपविभागीय अधिकाऱ्यांची भेट घेत आपले निवेदन सुपूर्द केले. ग्रामस्थांनी ग्रामसभेतच या प्रकल्पाला स्पष्ट नकार दिला असल्याने आता प्रशासनाने या प्रकल्पाच्या अनुषंगाने कोणतीही चर्चा, हालचाली अथवा जनसुनावणी आयोजित करण्याचे धाडस करू नये, अशी स्पष्ट आणि निर्वाणीची भूमिका संघर्ष समितीच्या वतीने या वेळी मांडण्यात आली.
उपविभागीय अधिकाऱ्यांना निवेदन सादर करतेवेळी संघर्ष समितीचे प्रमुख पदाधिकारी आणि ग्रामस्थ मोठ्या संख्येने उपस्थित होते. यामध्ये अशोक जाधव, अनिष निमकर, संजय दळवी, नारायण मिरगल, रमेश पाटणे, रूपेश कुटरेकर, प्रसाद देपोलकर, उल्हास मोरे, प्रभाकर बुरबांडकर, दत्ताराम गुरव, बापू कुटरेकर, जितेश पदुकले, संतोष बोरकर, चंद्रकांत निवणकर, अविनाश काष्टे आणि निखिल गुरव यांच्यासह परिसरातील प्रकल्पबाधित शेतकऱ्यांचा समावेश होता. बागायतदारांचे अस्तित्व आणि निसर्गाचा समतोल राखण्यासाठी या प्रकल्पाविरोधातील लढा अधिक तीव्र करण्याचा निर्धार ग्रामस्थांनी व्यक्त केल्यामुळे या भागातील वातावरण तापण्याची चिन्हे दिसत आहेत.
