दापोली: हर्णे येथील अडखळ खाडी परिसरात नांगरून ठेवलेल्या मच्छीमार नौकेवरून बेपत्ता झालेल्या एका खलाशाचा मृतदेह ऐतिहासिक सुवर्णदुर्ग किल्ल्याजवळील समुद्रात तरंगताना आढळून आल्याने खळबळ उडाली आहे. रोहीदास यशवंत धरणकर (वय ४० वर्षे, मूळ रा. कोळीवाडा, ता. श्रीवर्धन, जि. रायगड) असे या दुर्दैवी घटनेत मृत पावलेल्या खलाशाचे नाव आहे. या प्रकरणी दापोली पोलीस ठाण्यात आकस्मिक मृत्यूची नोंद करण्यात आली आहे.
मिळालेल्या माहितीनुसार, १ ऑक्टोबर रोजी रात्री साडेआठ वाजण्याच्या सुमारास रोहीदास धरणकर हे सहकारी महेश पोशा चोलकर यांच्यासमवेत रात्रीचे जेवण करून बोटीवर झोपले होते. दुसऱ्या दिवशी, २ ऑक्टोबर रोजी सकाळी साडेसहा वाजता महेश चोलकर यांनी खबर देणारे परशुराम बाळ्या चोगले यांना फोन करून रोहीदास बोटीवर दिसत नसल्याची माहिती दिली. त्यानंतर चोगले यांनी तातडीने अडखळ खाडीतील नौकेवर धाव घेऊन संपूर्ण बोटीवर व खाडीकिनारी शोध घेतला; मात्र रोहीदास मिळून आले नाहीत. त्यांनी तातडीने श्रीवर्धन येथील रोहीदास यांच्या नातेवाईकांशी संपर्क साधून चौकशी केली असता, ते गावीही पोहोचले नसल्याचे निष्पन्न झाले.
त्यानंतर परशुराम चोगले, बोटीवरील इतर खलाशी आणि स्थानिक ग्रामस्थांनी मिळून अडखळ, आंजर्ले खाडी परिसर तसेच सुवर्णदुर्ग किल्ल्याभोवतीच्या समुद्रात शोधमोहीम हाती घेतली होती. दरम्यान, ४ ऑक्टोबर रोजी दुपारी दीड वाजण्याच्या सुमारास सुवर्णदुर्ग किल्ल्याच्या बाजूला सुमारे सात वाव अंतरावर समुद्राच्या पाण्यात रोहीदास धरणकर यांचा मृतदेह पाण्यावर तरंगताना आढळून आला. या घटनेची माहिती मिळताच पोलिसांनी मृतदेह ताब्यात घेतला असून, परशुराम चोगले यांनी दिलेल्या खबरीवरून दापोली पोलीस ठाण्यात बीएनएसएस कलम १९४ अन्वये आकस्मिक मृत्यू क्र. ७४/२०२६ नुसार नोंद करण्यात आली असून पोलीस पुढील तपास करीत आहेत.
