दापोली : दापोली तालुक्यातील मुगीज कलमपेठ येथे बंद घराचे कुलूप व कोयंडा तोडून अज्ञात चोरट्याने घरात प्रवेश करत लोखंडी कपाटातील तब्बल ८ लाख रुपये किमतीचे सोन्याचे दागिने लंपास केल्याची घटना उघडकीस आली आहे. ही चोरी ३१ ऑगस्ट रोजी रात्री साडेआठ वाजल्यापासून १ सप्टेंबर रोजी सकाळी साडेसहा वाजेपर्यंतच्या कालावधीत घडली.
पोलिसांनी दिलेल्या माहितीनुसार, फिर्यादी पांडुरंग भिकू झाटे (वय ५०, व्यवसाय माळीकाम, सध्या रा. विठावा गजानन नगर, कोळीवाडा, ठाणे पश्चिम; मूळ रा. मुगीज कलमपेठ, ता. दापोली) यांचे घर क्रमांक ४७६ बंद होते. अज्ञात चोरट्याने घराच्या पुढील दरवाजाचे कुलूप व कोयंडा तोडला. तसेच पुढील पडवीलगतच्या भिंतीतील स्लायडिंग खिडकी सरकवून चोरट्याने घरातील खोलीत प्रवेश केला.
यानंतर घरातील लोखंडी कपाट उचकटून कपाटाच्या लॉकरमध्ये ठेवलेले सोन्याचे दागिने चोरून नेण्यात आले. चोरीस गेलेल्या ऐवजामध्ये सुमारे ३० ग्रॅम वजनाचे काळे मणी गुंफलेले सोन्याचे मंगळसूत्र, सुमारे २० ग्रॅम वजनाचे दुसरे सोन्याचे मंगळसूत्र, सुमारे १० ग्रॅम वजनाची सोन्याची चेन आणि सुमारे २० ग्रॅम वजनाचा सोन्याचा हार यांचा समावेश आहे. या सर्व दागिन्यांची एकूण किंमत सुमारे ८ लाख रुपये असल्याचे फिर्यादीत नमूद करण्यात आले आहे.
या प्रकरणी १ सप्टेंबर २०२६ रोजी दापोली पोलीस ठाण्यात गुन्हा क्रमांक १८९/२०२६ अन्वये भारतीय न्यायसंहिता अधिनियम २०२३ मधील कलम ३३१(४), ३०५(अ) प्रमाणे गुन्हा दाखल करण्यात आला आहे. अज्ञात चोरट्याविरुद्ध गुन्हा नोंदविण्यात आला असून, या घरफोडीचा तपास दापोली पोलीस करीत आहेत.
