लोणावळा : रक्ताच्या नात्याला काळीमा फासणारी आणि मन सुन्न करून टाकणारी एक अत्यंत धक्कादायक घटना लोणावळ्यात उघडकीस आली आहे. मालमत्तेच्या हव्यासापोटी ८३ वर्षांच्या वृद्ध आजोबाने स्वतःच्या ३३ वर्षीय तरुण नातवाची गोळ्या झाडून निर्घृण हत्या केली. ५ ऑक्टोबर रोजी भुशी गावातील ‘हॉटेल मोतीराम’च्या आवारात घडलेल्या या घटनेने संपूर्ण परिसर हादरला आहे. शिवसेना (ठाकरे गट) माजी नगरसेवक माणिक मराठे यांचे सुपुत्र अभय माणिक मराठे (वय ३३) हे आजोबांची रायफल साफ करताना अचानक गोळी सुटून जखमी झाल्याचा बनाव सुरुवातीला रचण्यात आला होता. गंभीर जखमी अवस्थेत रुग्णालयात दाखल केलेल्या अभय यांचा उपचारादरम्यान दुर्दैवी मृत्यू झाला.
मात्र, पोलिसांनी सखोल तपास चक्र फिरवताच हा कोणताही अपघात नसून मालमत्तेच्या विकृत वादातून रचलेला पूर्वनियोजित खुनाचा कट असल्याचे उघड झाले. नातवाचा जीव घेणाऱ्या ८३ वर्षीय आजोबा मोतीराम मराठे यांना पोलिसांनी बेड्या ठोकल्या आहेत. एवढेच नव्हे तर हत्येनंतर घटनास्थळावरील पुरावे नष्ट करण्याचा प्रयत्न करणाऱ्या कुटुंबातील इतर पाच जणांवरही गुन्हे दाखल करण्यात आले आहेत. ज्या वयात आजोबा नातवंडांना आशीर्वाद देतात, त्याच वयात संपत्तीच्या वादातून एका भरल्या घराचा कर्ता मुलगा रक्ताच्या थारोळ्यात संपवला गेल्याने हळहळ व्यक्त होत असून, लोणावळा पोलीस या प्रकरणाचा पुढील कसून तपास करत आहेत.
