दापोली : मुंबईला जाण्यासाठी घरातून पडलेल्या मुरुड येथील एका २७ वर्षीय तरुणाचा स्थानिक तलावात बुडून संशयास्पद मृत्यू झाल्याची धक्कादायक घटना उघडकीस आली आहे. प्रसाद अनंत बांद्रे (वय २७, रा. मुरुड भैरीचा कोंड, ता. दापोली) असे मृत तरुणाचे नाव असून या घटनेमुळे परिसरात मोठी खळबळ उडाली आहे.
मिळालेल्या माहितीनुसार, प्रसाद बांद्रे हा १ ऑक्टोबर २०२६ रोजी सकाळी सातच्या सुमारास मुंबईला जातो असे सांगून घरातून बाहेर पडला होता. त्यानंतर तब्बल दहा दिवस उलटूनही त्याचा काहीच ठावठिकाणा लागला नव्हता. दरम्यान, ११ ऑक्टोबर २०२६ रोजी सकाळी आठ वाजण्याच्या सुमारास मुरुड भैरीचा कोंड येथील तलावाच्या पाण्यावर एक मृतदेह तरंगताना ग्रामस्थांच्या दृष्टीस पडला. स्थानिक नागरिकांनी जवळ जाऊन पाहणी केली असता तो मृतदेह बेपत्ता असलेल्या प्रसाद बांद्रे याचा असल्याचे स्पष्ट झाले. या घटनेची माहिती मिळताच पोलिसांनी घटनास्थळी धाव घेऊन मृतदेह पाण्याबाहेर काढला. या प्रकरणी दापोली पोलीस ठाण्यात भारतीय नागरिक सुरक्षा संहिता (BNSS) कलम १९४ अन्वये आकस्मिक मृत्यू क्रमांक ७५/२०२६ अशी नोंद करण्यात आली आहे. मुंबईला जाण्यास निघालेला हा तरुण गावातीलच तलावात कसा पोहोचला आणि त्याचा पाण्यात बुडून मृत्यू नेमका कसा झाला, याबाबत परिसरात विविध तर्कवितर्क व्यक्त केले जात असून दापोली पोलीस या प्रकरणाचा अधिक तपास करत आहेत.
