दापोली : “स्वच्छ भारत, विकसित भारत” आणि “आपला समुद्र आपली जबाबदारी” हा मूलमंत्र प्रत्यक्ष कृतीत उतरवत हर्णै बंदर परिसरात ‘स्वच्छता ही सेवा अभियान २०२६’ अत्यंत उत्साहात व शिस्तबद्ध पद्धतीने पार पडले. ग्रामपंचायत हर्णै, सेवा चॅरिटेबल ट्रस्ट हर्णै (SEVA Charitable TRUST Harnai) आणि जेएनके मरीन ॲक्वा लाइफ (JNK Marine Aqua Life Harnai) यांच्या संयुक्त विद्यमाने आयोजित करण्यात आलेल्या या विशेष मोहिमेत नागरिक, विविध शाळांचे विद्यार्थी, प्रशासकीय अधिकारी आणि मान्यवरांनी मोठ्या संख्येने एकत्र येत अखंड श्रमदान केले.
सायंकाळी ४ ते ५ या वेळेत राबविण्यात आलेल्या या स्वच्छता मोहिमेदरम्यान संपूर्ण बंदर परिसराची सखोल स्वच्छता करून मोठ्या प्रमाणावर प्लास्टिक व इतर कचरा संकलित करण्यात आला. केवळ कचरा उचलण्यापुरते मर्यादित न राहता नदी, खाडी आणि समुद्र प्रदूषणाचे जलचरांवर होणारे घातक परिणाम रोखणे तसेच स्थानिक सागरी जैवविविधतेचे रक्षण करणे, याबाबत उपस्थितांनी नागरिकांमध्ये जनजागृती केली. “चला, एकत्र येऊया; हर्णै स्वच्छ करूया!” अशी साद घालत पर्यावरण संरक्षणासाठी सर्वांनी पुढे येण्याचे आवाहन यावेळी करण्यात आले.
या अभियानाला जिल्हा परिषद सदस्या ऐश्वर्या धाडवे, गटविकास अधिकारी मंडलिक, सहाय्यक गटविकास अधिकारी मर्चंडे, विस्तार अधिकारी खांडके व भुसारे, हर्णै ग्रामपंचायत प्रशासक मोहिते व कर्मचारी वर्ग, माजी सरपंच महेश पवार, हर्णैचे तलाठी अक्षय पाटील, वनरक्षक प्रभू साबणे, सर्पमित्र सुरेश खानविलकर व किरण करमरकर यांची प्रमुख उपस्थिती लाभली. पर्यावरण जनजागृतीसाठी ज्येष्ठ पत्रकार डॉ. प्रशांत परांजपे, निवेदिता प्रतिष्ठानच्या सदस्या वैष्णवी मराठे वैद्य, गायत्री अय्यर, श्री. अय्यर आणि अविनाश खुळे (दापोली) यांनीही सक्रिय सहभाग नोंदवला. याशिवाय एन. डी. गोळे हायस्कूल व नॅशनल हायस्कूल हर्णैचे शिक्षक व विद्यार्थी, अंगणवाडी सेविका, आशा सेविका आणि हर्णै ज्येष्ठ नागरिक वर्गाने दाखवलेला उत्स्फूर्त उत्साह या उपक्रमाचे मुख्य आकर्षण ठरला. समुद्र आणि खाडी परिसर स्वच्छ राखण्यासाठी स्थानिक ग्रामस्थांनी एकत्र येऊन दिलेला हा पर्यावरणपूरक लढा संपूर्ण किनारपट्टी भागात कौतुकाचा विषय ठरला असून, आयोजकांनी सर्व सहभागी घटकांचे शेवटी आभार मानले.
