चिपळूण: चालू खरीप हंगामातील पिकांची अचूक नोंद सातबारा उताऱ्यावर होण्याच्या दृष्टीने वहाळ जिल्हा परिषद गटातील सर्व शेतकऱ्यांनी ई-पिक पाहणी करून घ्यावी, असे आवाहन जिल्हा परिषद सदस्या तथा स्थायी समिती सदस्या सौ. शिवानी संदीप सावंत यांनी केले आहे. शासनामार्फत राबविल्या जाणाऱ्या ई-पिक पाहणीच्या माध्यमातून शेतकऱ्यांच्या शेतातील चालू पिकांची नोंदणी थेट शासकीय दप्तरी अधिकृतपणे केली जात असल्याने ही प्रक्रिया वेळेत पूर्ण करून घेणे अत्यंत आवश्यक ठरले आहे.
या मोहिमेच्या सुलभतेसाठी आणि शेतकऱ्यांना प्रत्यक्ष मदत मिळण्यासाठी गावनिहाय ई-पिक पाहणी सहाय्यकांची नियुक्ती करण्यात आली आहे. शेतकऱ्यांनी आपल्या शेतात घेतलेल्या खरीप पिकांची वस्तुनिष्ठ व अचूक माहिती उपलब्ध करून देऊन या सहाय्यकांच्या सहकार्याने नोंदणी पूर्ण करावी, असे सांगण्यात आले आहे. ई-पिक पाहणी करताना शेतकऱ्यांना कोणत्याही तांत्रिक अडचणी आल्यास त्यांनी संबंधित नियुक्त सहाय्यक अथवा महसूल विभागातील जबाबदार अधिकाऱ्यांशी थेट संपर्क साधावा, असेही स्पष्ट करण्यात आले आहे.
वहाळ जिल्हा परिषद गटातील एकही पात्र शेतकरी या प्रक्रियेपासून वंचित राहू नये आणि कोणाचीही नोंदणी प्रलंबित राहू नये, यासाठी बळीराजाने स्वतः पुढे येऊन ही मोहीम मुदतीत पूर्ण करावी, असा पुनरुच्चार सौ. शिवानी संदीप सावंत यांनी केला आहे.
