७४२ विद्यार्थ्यांना आपत्कालीन परिस्थितीत सुरक्षितता व बचावकार्याचे प्रात्यक्षिकातून मार्गदर्शन
चिपळूण: आपत्तीच्या प्रसंगी घाबरून न जाता प्रसंगावधान राखणे, स्वतःचा बचाव करणे तसेच गरजेनुसार इतरांना मदत करण्यासाठी आवश्यक कौशल्ये विद्यार्थ्यांना अवगत व्हावीत, या उद्देशाने सह्याद्री शिक्षण संस्था संचलित गोविंदराव निकम माध्यमिक व उच्च माध्यमिक विद्यालय, सावर्डे येथे आपत्ती व्यवस्थापन, शोध व बचाव प्रशिक्षण आयोजित करण्यात आले. राष्ट्रीय शाळा सुरक्षा धोरणांतर्गत जिल्हा परिषद शिक्षण विभाग, रत्नागिरी यांच्या वतीने राष्ट्रीय आपत्ती प्रशिक्षण संस्था, मुंबई यांच्या मार्गदर्शनाखाली हे प्रशिक्षण घेण्यात आले.
विद्यालयाचे मुख्याध्यापक राजेंद्रकुमार वारे, उपमुख्याध्यापक विजय चव्हाण व पर्यवेक्षक महेश कुलकर्णी यांच्या मार्गदर्शनाखाली झालेल्या या प्रशिक्षणात युगंधरा महामुनकर यांनी विद्यार्थ्यांना आपत्ती व्यवस्थापन, शोध व बचावकार्याबाबत सविस्तर मार्गदर्शन केले. या प्रशिक्षणाचा लाभ विद्यालयातील तब्बल ७४२ विद्यार्थ्यांनी घेतला.
प्रशिक्षणादरम्यान विद्यार्थ्यांना केवळ सैद्धांतिक माहिती न देता विविध बाबींची प्रत्यक्ष प्रात्यक्षिके करून दाखविण्यात आली. अपघातामध्ये एखाद्या व्यक्तीला गंभीर दुखापत झाल्यास तिला सुरक्षितपणे कसे उचलावे, जखमी व्यक्तीला हलविताना कोणती खबरदारी घ्यावी, तसेच रुग्णाला उचलण्याच्या विविध पद्धती यांचे प्रात्यक्षिक विद्यार्थ्यांसमोर सादर करण्यात आले.
हात किंवा पायाला दुखापत झाल्यास जखमी व्यक्तीची काळजी कशी घ्यावी, दुखापत वाढू नये यासाठी कोणती खबरदारी घ्यावी आणि आवश्यकतेनुसार वैद्यकीय मदत कशी मिळवावी, याबाबतही विद्यार्थ्यांना मार्गदर्शन करण्यात आले.
नैसर्गिक तसेच मानवनिर्मित आपत्तींचे स्वरूप, आपत्तीपूर्व तयारीचे महत्त्व आणि आपत्तीच्या वेळी स्वतःसह इतरांचा बचाव करण्याच्या पद्धती याबाबत माहिती देण्यात आली. तसेच आग लागल्यास घाबरून न जाता फायर एक्स्टिंग्विशरचा योग्य वापर कसा करावा, याचेही प्रात्यक्षिकातून मार्गदर्शन करण्यात आले.
या प्रशिक्षणामुळे विद्यार्थ्यांमध्ये आपत्तीच्या प्रसंगी प्रसंगावधान राखणे, सुरक्षितता जपणे आणि योग्य पद्धतीने बचावकार्य करण्याबाबत जागरूकता निर्माण झाली. आपत्ती आली तर घाबरायचे नाही, तर ज्ञान, कौशल्य आणि प्रसंगावधानाच्या जोरावर परिस्थितीचा सामना करायचा, हा महत्त्वपूर्ण संदेश या प्रशिक्षणातून विद्यार्थ्यांना मिळाला.
