संगमेश्वर / संदेश जिमन : जिल्हास्तरीय शालेय कुस्ती स्पर्धेत संगमेश्वर एज्युकेशन सोसायटी, कसबा-संगमेश्वर संचलित न्यू इंग्लिश हायस्कूल अँड ज्युनिअर कॉलेजचा विद्यार्थी पुष्कर दत्ताराम गिते याने दमदार कामगिरी करत द्वितीय क्रमांक पटकावला. त्याच्या या यशामुळे शाळेसह संगमेश्वरच्या शिरपेचात आणखी एक मानाचा तुरा खोवला गेला आहे.
पुष्कर गिते याने १९ वर्षांखालील ग्रीको-रोमन कुस्ती प्रकारातील ६७ किलो वजनी गटात सहभाग घेतला होता. जिल्हास्तरीय स्पर्धेत विविध प्रतिस्पर्ध्यांशी लढत देत त्याने उत्कृष्ट कौशल्याचे प्रदर्शन केले आणि द्वितीय क्रमांक मिळवत आपली गुणवत्ता सिद्ध केली. प्रतिकूल परिस्थितीतही सातत्यपूर्ण सराव, मेहनत आणि जिद्दीच्या जोरावर त्याने मिळवलेले हे यश उल्लेखनीय मानले जात आहे.
पुष्करच्या या यशाबद्दल न्यू इंग्लिश हायस्कूल अँड ज्युनिअर कॉलेजमधील शिक्षक, शिक्षकेतर कर्मचारी, संस्थेचे पदाधिकारी, पालक तसेच संगमेश्वर परिसरातील क्रीडाप्रेमींनी त्याचे अभिनंदन केले आहे. कुस्ती क्षेत्रात मिळवलेल्या या यशामुळे पुष्करच्या पुढील क्रीडा वाटचालीकडे संगमेश्वर परिसरातील क्रीडाप्रेमींचे लक्ष लागले असून, आगामी स्पर्धांमध्येही तो उल्लेखनीय कामगिरी करेल, असा विश्वास व्यक्त केला जात आहे.
