सावर्डे (प्रतिनिधी) : क्रीडा व युवक सेवा संचालनालय, महाराष्ट्र राज्य आणि रत्नागिरी जिल्हा क्रीडा कार्यालय यांच्या संयुक्त विद्यमाने आयोजित शालेय क्रीडा स्पर्धांमध्ये सह्याद्री शिक्षण संस्था संचलित गोविंदराव निकम माध्यमिक व उच्च माध्यमिक विद्यालय, सावर्डेच्या विद्यार्थ्यांनी आपल्या यशाची परंपरा कायम राखत क्रीडा क्षेत्रात उत्तुंग भरारी घेतली आहे. एस. व्ही. जे. सी. टी. डेरवण येथे संपन्न झालेल्या जिल्हास्तरीय रायफल शूटिंग स्पर्धेत विद्यालयाचा खेळाडू जय सावंत याने पीप साईट प्रकारात ३८५ गुणांची चमकदार कमाई करत द्वितीय क्रमांक पटकावला. या उल्लेखनीय कामगिरीच्या बळावर त्याची आगामी विभागस्तरीय रायफल शूटिंग स्पर्धेसाठी रत्नागिरी जिल्ह्याचा प्रतिनिधी म्हणून निवड झाली आहे.
क्रीडा शिक्षक दादासाहेब पांढरे, रोहित गमरे, अमृत कडगावे आणि प्रशांत सकपाळ यांच्या दर्जेदार मार्गदर्शनाखाली जय सावंतने हे घवघवीत यश संपादन केले. त्याच्या या अभिमानास्पद यशाबद्दल सह्याद्री शिक्षण संस्थेचे अध्यक्ष व आमदार शेखरजी निकम, उपाध्यक्ष प्रशांतशेठ निकम, युगंधरा राजेशिर्के, डॉ. इसाक खतीब, कार्याध्यक्ष अनिरुद्ध निकम, सचिव महेश महाडिक, संस्थेचे विश्वस्त व शालेय समितीचे चेअरमन शांताराम खानविलकर यांच्यासह सर्व संस्था पदाधिकारी आणि शालेय समिती सदस्यांनी कौतुक केले आहे. तसेच मुख्याध्यापक राजेंद्रकुमार वारे, उपमुख्याध्यापक विजय चव्हाण व पर्यवेक्षक महेश कुलकर्णी यांनी विजयी खेळाडू व मार्गदर्शक शिक्षकांचे विशेष अभिनंदन करत विभागस्तरावरील पुढील आव्हानासाठी जय सावंत याला शुभेच्छा दिल्या आहेत.
