चिपळूण: प्रदीर्घ आणि निष्कलंक पोलीस सेवेनंतर ३१ ऑक्टोबर रोजी सेवानिवृत्त झालेले उपविभागीय पोलीस अधिकारी प्रकाश बेले यांचा शिवसेना (उद्धव बाळासाहेब ठाकरे) पक्षातर्फे पुष्पगुच्छ देऊन विशेष सन्मान करण्यात आला. चिपळूणमधील त्यांच्या कार्यकाळात कायदा व सुव्यवस्था राखण्यासोबतच गुन्हेगारी नियंत्रण, वाहतूक शिस्त आणि सामाजिक सलोखा जपण्यासाठी केलेल्या उल्लेखनीय कार्याचा यावेळी गौरव करण्यात येऊन त्यांना भावी आयुष्यासाठी सदिच्छा देण्यात आल्या.
पोलीस खात्यातील सेवा ही केवळ बंदोबस्तापुरती मर्यादित न राहता नागरिकांमध्ये सुरक्षेची भावना निर्माण करणे आणि समाजाला संकटातून बाहेर काढणे ही पोलिसांची खरी जबाबदारी असते, या व्यापक भूमिकेतून प्रकाश बेले यांनी चिपळूणमध्ये काम पाहिले. विशेषतः तरुण पिढीला विळखा घालणाऱ्या अमली पदार्थांच्या समस्येविरोधात ठोस कृती आराखडा राबवून त्यांनी नागरिक आणि सामाजिक संघटनांना या लढ्यात एकत्र आणले. याशिवाय गणेशोत्सवासह सर्व सार्वजनिक उत्सव शांततेत पार पाडणे, गंभीर गुन्ह्यांच्या तपासात पथकांना अचूक दिशा देणे आणि वाहतूक व्यवस्थेला शिस्त लावणे या त्यांच्या कामगिरीची वृत्तमाध्यमांनीही वेळोवेळी दखल घेतली होती.
या सन्मानप्रसंगी भावना व्यक्त करताना जिल्हा सोशल मीडिया प्रमुख सचिन चोरगे यांनी बेले यांच्या सेवेचा गौरव केला. वर्दी उतरली तरी कर्तव्याची ओळख कायम राहते आणि पदाचा कार्यकाळ संपला तरी माणसांच्या मनात निर्माण केलेला विश्वास कधीही संपत नाही, अशा शब्दांत त्यांनी प्रकाश बेले यांच्या चिपळूणमधील सेवेला सलाम केला. पोलीस यंत्रणेतील अधिकाऱ्यांच्या संवेदनशील आणि तत्पर भूमिकेमुळेच सर्वसामान्य नागरिकांचा प्रशासनावरील विश्वास दृढ होतो, असेही यावेळी नमूद करण्यात आले.
या कार्यक्रमास शिवसेना चिपळूण शहरप्रमुख सचिन (भैय्या) कदम, जिल्हा सोशल मीडिया प्रमुख सचिन चोरगे, युवासेना शहर अधिकारी पार्थ जागुष्टे, शहर सचिव प्रशांत मुळ्ये तसेच युवासेना उपशहर अधिकारी आकाश कदम आदी प्रमुख पदाधिकारी उपस्थित होते. प्रदीर्घ आणि आव्हानात्मक सेवेनंतर सुरू होणाऱ्या आयुष्याच्या नव्या पर्वात बेले यांना उत्तम आरोग्य, दीर्घायुष्य, मनःशांती आणि कौटुंबिक सौख्य लाभावे, अशा मनःपूर्वक शुभेच्छा उपस्थित मान्यवरांनी दिल्या.
