सावर्डे : क्रीडा व युवक सेवा संचालनालय, महाराष्ट्र राज्य, पुणे तसेच रत्नागिरी जिल्हा क्रीडा कार्यालय यांच्या संयुक्त विद्यमाने एस. व्ही. जे. सी. टी. डेरवण येथे आयोजित करण्यात आलेल्या १४ वर्षे मुले-मुली व १९ वर्षे मुले-मुली गटातील कबड्डी स्पर्धेत सह्याद्री शिक्षण संस्था संचलित गोविंदराव निकम माध्यमिक व उच्च माध्यमिक विद्यालय, सावर्डेच्या १४ वर्षे मुले कबड्डी संघाने दमदार कामगिरी करत तालुकास्तरीय स्पर्धेत प्रथम क्रमांक पटकावला. या विजयानंतर सावर्डे विद्यालयाच्या संघाने जिल्हास्तरीय कबड्डी स्पर्धेत दिमाखदार प्रवेश केला आहे.
चिपळूण तालुक्यातील विविध विद्यालयांच्या संघांनी सहभाग घेतलेल्या या स्पर्धेतील अंतिम सामना अत्यंत चुरशीचा झाला. अंतिम लढतीत सावर्डे विद्यालयाच्या संघाने युनायटेड इंग्लिश स्कूल, चिपळूणच्या संघावर मात करत विजेतेपद आपल्या नावावर केले. उत्कृष्ट सांघिक खेळ, आक्रमक चढाया आणि भक्कम बचावाच्या जोरावर सावर्डे संघाने सामन्यावर वर्चस्व राखत शानदार विजय मिळवला.
विजयी सावर्डे संघात आर्यन घाणेकर, अथर्व कानसे, रुद्र खापरे, नैतिक जाधव, ओंकार चव्हाण, अथर्व बेचावडे, नंदन घाणेकर, दीपराज चाळके, मानव भुवड, सर्वेश खापरे आणि तनिष कानसे या खेळाडूंचा समावेश आहे. या खेळाडूंना विद्यालयाचे क्रीडाशिक्षक दादासाहेब पांढरे, रोहित गमरे, अमृत कडगावे आणि प्रशांत सकपाळ यांचे मार्गदर्शन लाभले.
सावर्डे विद्यालयाच्या या उल्लेखनीय यशाबद्दल सह्याद्री शिक्षण संस्थेचे अध्यक्ष व आमदार शेखरजी निकम, उपाध्यक्ष प्रशांतशेठ निकम, युगंधरा राजेशिर्के, डॉ. इसाक खतीब, कार्याध्यक्ष अनिरुद्ध निकम, सचिव महेश महाडिक, संस्थेचे विश्वस्त व शालेय समितीचे चेअरमन शांताराम खानविलकर यांच्यासह संस्थेचे पदाधिकारी, शालेय समिती सदस्य, विद्यालयाचे मुख्याध्यापक राजेंद्रकुमार वारे, उपमुख्याध्यापक विजय चव्हाण आणि पर्यवेक्षक महेश कुलकर्णी यांनी विजयी खेळाडू व मार्गदर्शक शिक्षकांचे अभिनंदन केले. आगामी जिल्हास्तरीय स्पर्धेसाठी संघाला शुभेच्छा देण्यात आल्या. या विजयामुळे सावर्डे विद्यालयाच्या क्रीडा क्षेत्रातील यशात आणखी एका मानाच्या तुऱ्याची भर पडली आहे.
