संत ज्ञानेश्वरांच्या ७५०व्या जयंतीनिमित्त चिपळुणात ‘ज्ञानभक्ती स्वरशक्ती’चे आयोजन

चिपळूण : संत ज्ञानेश्वर माऊली यांच्या ७५०व्या जयंतीनिमित्त महाराष्ट्र शासनाच्या सांस्कृतिक कार्य विभाग, सांस्कृतिक कार्य संचालनालय, महाराष्ट्र राज्य, मुंबई यांच्या वतीने ‘ज्ञानभक्ती स्वरशक्ती’ या लोकसंस्कृती आणि सांस्कृतिक वैभव सोहळ्याचे आयोजन करण्यात आले आहे.

हा सांस्कृतिक कार्यक्रम शुक्रवार, २ ऑक्टोबर २०२६ रोजी सायंकाळी ७ वाजता इंदिरा गांधी सांस्कृतिक केंद्र, चिपळूण येथे होणार आहे. कार्यक्रमास रसिकांना विनामूल्य प्रवेश असून, सस्नेह निमंत्रण देण्यात आले आहे.

कार्यक्रमात निवेदक पंकज विष्णू आणि निवेदिका रश्मी आमडेकर सहभागी होणार आहेत. गायक म्हणून मृण्मयी फाटक आणि ओंकार बंडबे, तर भारूड सादरीकरण ऋतुराज फडके आणि ओंकार बंडबे करणार आहेत. तसेच मयुरा पालांडे, संजना पाटील आणि भाग्यश्री दळवी यांच्या नृत्याचे सादरीकरण होणार आहे.

या सांस्कृतिक सोहळ्याच्या माध्यमातून संत ज्ञानेश्वरांच्या विचारांचा आणि महाराष्ट्राच्या समृद्ध लोकसंस्कृतीचा जागर करण्यात येणार असून, चिपळूणमधील रसिकांनी मोठ्या संख्येने उपस्थित राहावे, असे आवाहन आयोजकांकडून करण्यात आले आहे.