संगमेश्वर: दक्षिण रत्नागिरी लघुपाटबंधारे विभागाच्या अखत्यारीतील कडवई धरणाच्या मुख्य भिंतीतून आणि सांडव्याच्या भागातून मोठ्या प्रमाणात पाण्याचा अपव्यय सुरू असल्याने परिसरात तीव्र चिंतेचे वातावरण पसरले आहे. यंदा पावसाने ओढ दिल्याने निर्माण झालेल्या संभाव्य दुष्काळी परिस्थितीत ही गळती वेळीच न रोखल्यास कडवईसह आसपासच्या भागाला भीषण पाणीटंचाईचा तडाखा बसण्याची दाट शक्यता निर्माण झाली आहे. सुमारे ५० वर्षांपासून परिसरातील विहिरींची भूजल पातळी टिकवून ठेवणारे आणि ५.५० चौरस किलोमीटर पाणलोट क्षेत्र लाभलेले हे धरण गावासाठी जीवनवाहिनी मानले जाते. मात्र, गेल्या चार वर्षांपासून भिंत व सांडव्याला लागलेली गळती बंद करण्यासाठी लाखो रुपयांच्या निविदा काढून दुरुस्तीकामे करूनही समस्येवर अद्याप मात करता आलेली नाही, अशी संतप्त प्रतिक्रिया स्थानिक व्यक्त करत आहेत.
अपुऱ्या पावसामुळे पाणीसाठ्यात आधीच घट झालेली असताना सांडव्याभोवती वाढलेल्या दाट झाडीझुडपांमुळे नेमका किती विसर्ग सुरू आहे याचा अंदाज बांधणेही कठीण झाले आहे. या गंभीर विषयावर नुकत्याच झालेल्या ग्रामसभेत ग्रामस्थांनी आवाज उठवत तातडीने दुरुस्ती करण्याची मागणी लावून धरली. या पार्श्वभूमीवर ग्रामपंचायतीने लघुपाटबंधारे विभागाच्या कार्यकारी अभियंत्यांना अधिकृत लेखी निवेदन सादर केल्याची माहिती ग्रामाधिकारी राहुलकुमार चौधरी यांनी दिली. दरम्यान, दोन वर्षांपूर्वी गळती रोखण्यासाठी झालेले प्रयत्न अपेक्षेप्रमाणे यशस्वी ठरले नसल्याची कबुली पाटबंधारे विभागाचे शाखा अभियंता चंद्रकांत धामापूरकर यांनी दिली आहे. धरणातून विसर्ग सुरू असला तरी सद्यस्थितीत गावात तीव्र टंचाई भासणार नाही, मात्र पाण्याचा वापर काटकसरीने करावा लागेल आणि सांडव्यावरील झाडी तातडीने हटवली जाईल, असा दावा त्यांनी केला. तरीही, पावसाअभावी धरण पूर्ण क्षमतेने भरलेले नसताना बहुमूल्य पाणी असेच वाहून गेले तर उन्हाळ्यात नागरिकांना पाण्यासाठी वणवण करावी लागेल, त्यामुळे प्रशासनाने वेळकाढूपणा न करता तातडीने ठोस उपाययोजना करावी, अशी आग्रही मागणी ग्रामस्थांमधून केली जात आहे.
