देवरुख: ग्रामीण भागातील गरीब, गरजू आणि वयोवृद्ध नागरिकांच्या आरोग्याची काळजी घेत साडवली येथे मोफत नेत्र तपासणी व मोतीबिंदू शस्त्रक्रिया शिबिराचे यशस्वी आयोजन करण्यात आले. युवासेना संगमेश्वर तालुका, चिपळूण येथील नॅब आय हॉस्पिटल आणि प्रबोधन शिक्षण प्रसारक संस्थेचे इंदिरा इन्स्टिट्यूट ऑफ फार्मसी (एनएसएस व युबीए विभाग) यांच्या संयुक्त विद्यमाने राबवण्यात आलेल्या या समाजोपयोगी आरोग्य उपक्रमाचे उद्घाटन प्रबोधन शिक्षण प्रसारक संस्थेचे अध्यक्ष तथा माजी राज्यमंत्री रवींद्र माने यांच्या हस्ते सर्व मान्यवरांच्या उपस्थितीत पार पडले. युवासेना महाराष्ट्र राज्य सहसचिव प्रद्युम्न रवींद्र माने यांच्या संकल्पनेतून व मार्गदर्शनाखाली हे शिबिर संपन्न झाले असून परिसरातील ६० हून अधिक रुग्णांनी याचा थेट लाभ घेतला.
शिबिरात नॅब आय हॉस्पिटल, चिपळूण येथील नेत्रतज्ज्ञ डॉ. संगीता खरात यांनी उपस्थित सर्व रुग्णांची सखोल नेत्रतपासणी करून आवश्यक त्या वैद्यकीय चाचण्या केल्या. तपासणीअंती मोतीबिंदू आढळलेल्या पात्र रुग्णांची निवड करून पुढील शस्त्रक्रियेसाठी त्यांचे वर्गीकरण करण्यात आले. या सर्व गरजू रुग्णांवर मोफत शस्त्रक्रिया केली जाणार असून त्यांना आवश्यक औषधोपचार तसेच शस्त्रक्रियेदरम्यान राहण्याची व भोजनाची संपूर्ण व्यवस्था विनामूल्य पुरवली जाणार आहे.
या उद्घाटनप्रसंगी दिव्यांग मित्र संदीप नलावडे, समाजसेविका सौ. रेवा कदम, कै. सौ. मीनाताई ठाकरे हायस्कूलचे मुख्याध्यापक बळवंत नलावडे आणि इंदिरा इन्स्टिट्यूट ऑफ फार्मसीचे प्राचार्य डॉ. अमोल खाडे उपस्थित होते. विशेष म्हणजे या शिबिराच्या पूर्वतयारीपासून ते यशस्वी आयोजनापर्यंत इंदिरा इन्स्टिट्यूट ऑफ फार्मसीच्या अंतिम वर्ष बी. फार्मचा दिव्यांग विद्यार्थी वाहिब कडवईकर याने स्वतः पुढाकार घेऊन अहोरात्र परिश्रम घेतले. त्याच्या या अनोख्या सामाजिक बांधिलकीचे आणि सेवाभावी वृत्तीचे उपस्थित मान्यवरांनी विशेष कौतुक केले. याशिवाय महाविद्यालयाचे एनएसएस समन्वयक प्रा. प्रशील चरकरी, एनएसएस सह-समन्वयक प्रा. वैष्णवी दुडये, युबीए समन्वयक प्रा. वैष्णवी नलावडे यांच्यासह शिक्षक, शिक्षकेतर कर्मचारी व विद्यार्थ्यांनी शिबिरासाठी परिश्रम घेतले. डोळ्यांच्या गंभीर विकारांवर मोफत उपचारांची संधी उपलब्ध करून दिल्याबद्दल लाभार्थी रुग्ण आणि ग्रामस्थांनी आयोजकांचे आभार मानले.
