संगमेश्वर: नवरात्रोत्सवाच्या पावन पर्वावर कायदा व सुव्यवस्था अबाधित राखण्यासाठी कर्तव्य बजावणाऱ्या संगमेश्वर पोलीस ठाण्यातील महिला पोलीस अंमलदारांचा सन्मान करण्यात आला. कोंड असुर्डे येथील सामाजिक कार्यकर्ते संजय धोंडू शिंदे, नावडी येथील सामाजिक कार्यकर्त्या व महिला सुरक्षा समितीच्या सदस्या अर्पिता राहुल कोकाटे तसेच साप्ताहिक पोलीस तपासचे उपसंपादक व सामाजिक कार्यकर्ते दिनेश हरिभाऊ आंब्रे यांनी पुढाकार घेत महिला पोलीस अंमलदारांना शाल व पुष्पगुच्छ देऊन त्यांचा यथोचित गौरव केला.
याच कार्यक्रमादरम्यान संगमेश्वरचे पोलीस निरीक्षक नितेश केणी तसेच ‘आपले सरकार’ ॲपवर उल्लेखनीय व उत्कृष्ट कामगिरी बजावणारे पोलीस हेड कॉन्स्टेबल किशोर जोयशी यांचाही शाल, श्रीफळ व पुष्पगुच्छ देऊन विशेष सत्कार करण्यात आला आणि त्यांच्या भावी वाटचालीस शुभेच्छा देण्यात आल्या. याप्रसंगी ठाणे अंमलदार सतीश कोलगे व विश्वास बारगाळे उपस्थित होते. नवरात्रोत्सवासारख्या सणासुदीच्या काळात ड्युटीवर असताना सामाजिक कार्यकर्त्यांनी घेतलेल्या या पुढाकारामुळे आणि केलेल्या सन्मानामुळे उपस्थित सर्व महिला पोलीस कर्मचाऱ्यांनी मनापासून आनंद व्यक्त करत आभार मानले.
