देवरुख :देवरुख-संगमेश्वर-साखरपा हा तालुक्यातील प्रमुख मार्ग असून, या रस्त्याची मोठ्या प्रमाणात दुरवस्था झाल्याचा आरोप गाव विकास समिती, रत्नागिरी जिल्ह्याने केला आहे. रस्त्यावर ठिकठिकाणी खड्डे पडल्याने वाहनचालक आणि प्रवाशांना त्रास सहन करावा लागत असून, रस्त्याची अवस्था दिवसेंदिवस बिकट होत असल्याचे समितीचे जिल्हाध्यक्ष शामकर्ण भोपळकर यांनी म्हटले आहे.
या रस्त्याच्या दुरवस्थेविरोधात गाव विकास समितीने यापूर्वी दोन वेळा आंदोलन केले असल्याचे भोपळकर यांनी सांगितले. तालुक्याचा प्रमुख मार्ग असूनही त्याच्या देखभाल-दुरुस्तीकडे अपेक्षित गांभीर्याने पाहिले जात नसल्याची नाराजी त्यांनी व्यक्त केली.
“तालुक्याचा प्रमुख रस्ता असलेल्या या मार्गाच्या दुरावस्थेवर आमदारांनी बोलायला हवे. मात्र ते याबाबत का बोलत नाहीत?” असा सवाल शामकर्ण भोपळकर यांनी उपस्थित केला आहे.
रस्त्याच्या दुरुस्तीची कामे होत असतील तर त्यांची गुणवत्ता आणि टिकाऊपणा तपासणे आवश्यक असल्याचे समितीचे म्हणणे आहे. वारंवार दुरुस्ती करूनही रस्ता पुन्हा खराब होत असल्यास त्याची कारणे तपासून संबंधित यंत्रणेने जबाबदारी निश्चित करावी, अशी मागणी करण्यात आली आहे.
देवरुख-संगमेश्वर-साखरपा मार्गाची कायमस्वरूपी आणि दर्जेदार दुरुस्ती करून प्रवाशांना सुरक्षित वाहतुकीची सुविधा उपलब्ध करून द्यावी, अशी मागणी गाव विकास समितीने केली आहे.
