रत्नागिरी : शहरातील मिरकरवाडा जेटी परिसरात अचानक बेशुद्ध पडलेल्या एका २० वर्षीय नेपाळी तरुणाचा उपचारापूर्वीच मृत्यू झाल्याची दुर्दैवी घटना घडली आहे. ईश्वर रामकृष्ण चौधरी (वय २०, मूळ रा. भजनी, जि. कैलाली, नेपाळ; सध्या रा. मिरकरवाडा जेटी, रत्नागिरी) असे मयत तरुणाचे नाव असून, याप्रकरणी रत्नागिरी शहर पोलीस ठाण्यात आकस्मिक मृत्यूची नोंद करण्यात आली आहे.
मिळालेल्या माहितीनुसार, ईश्वर चौधरी हा मिरकरवाडा जेटी येथे वास्तव्यास होता. ३ ऑक्टोबर रोजी सायंकाळी पाच वाजण्याच्या सुमारास तो जेटी परिसरात अचानक चक्कर येऊन बेशुद्ध अवस्थेत खाली पडला. ही बाब निदर्शनास येताच त्याचे सहकारी भरत खुशीराम चौधरी व इतर स्थानिकांनी तातडीने धाव घेत त्याला उपचारासाठी रत्नागिरी येथील शासकीय जिल्हा रुग्णालयात (सिव्हिल हॉस्पिटल) दाखल केले. मात्र, सायंकाळी पावणेसहा वाजण्याच्या सुमारास तेथील वैद्यकीय अधिकाऱ्यांनी तपासणीअंती ईश्वर याला उपचारापूर्वीच मयत घोषित केले. अचानक घडलेल्या या घटनेमुळे जेटी परिसरातील कामगारांमध्ये हळहळ व्यक्त होत आहे.
याप्रकरणी भरत खुशीराम चौधरी यांनी दिलेल्या माहितीवरून रत्नागिरी शहर पोलीस ठाण्यात भारतीय नागरिक सुरक्षा संहिता (BNSS) कलम १९४ अन्वये आकस्मिक मृत्यू क्रमांक १२५/२०२६ नुसार नोंद करण्यात आली असून, शहर पोलीस पुढील तपास करत आहेत.
