पुणे : चारित्र्यावर संशय घेऊन ज्या पतीने पत्नीच्या जीवावर उठण्याचा प्रयत्न केला, त्याच पतीविरोधात न्यायालयात पत्नीनेच आरोप फेटाळले. मात्र, तिची साक्ष बदलली म्हणून सत्य झाकले गेले नाही. वैद्यकीय पुराव्यांनी या धक्कादायक प्रकारावरचा पडदा दूर केला आणि पत्नीच्या जीवाशी खेळणाऱ्या पतीला अखेर कायद्याचा हिसका बसला. पुण्यातील अतिरिक्त सत्र न्यायालयाने आरोपीला सात वर्षे सक्तमजुरी आणि ७० हजार रुपयांच्या दंडाची शिक्षा सुनावली. अतिरिक्त सत्र न्यायाधीश अनिरुद्ध गांधी यांनी हा निकाल दिला.
सोमनाथ साधू सपकाळ (वय ४५) असे शिक्षा सुनावण्यात आलेल्या आरोपीचे नाव आहे. पत्नीच्या चारित्र्यावर संशय घेत त्याने तिला जीवे मारण्याच्या उद्देशाने कॅप्सूलमधून ब्लेडचे तुकडे खायला दिल्याचा प्रकार ऑक्टोबर २०२३ मध्ये उघडकीस आला होता. याप्रकरणी उत्तमनगर पोलीस ठाण्यात गुन्हा दाखल करण्यात आला होता.
पत्नीच्या पोटात अचानक तीव्र वेदना सुरू झाल्यानंतर या अमानुष प्रकाराची भीषणता समोर आली. शौचावाटे ब्लेडचे तुकडे बाहेर पडू लागल्यानंतर ८ नोव्हेंबर रोजी तिला उपचारासाठी रुग्णालयात दाखल करण्यात आले. डॉक्टरांनी केलेल्या तपासणीत तिच्या पोटात ब्लेडचा तुकडा असल्याचे स्पष्ट झाले. तपासादरम्यान पतीने कॅल्शियमच्या गोळ्या असल्याचे भासवून कॅप्सूलमध्ये ब्लेडचे तुकडे भरले आणि ते पत्नीला खायला दिल्याचे निष्पन्न झाले. या प्रकरणानंतर पोलिसांनी आरोपीला अटक केली.
न्यायालयातील सुनावणीदरम्यान या प्रकरणाला वेगळेच वळण मिळाले. पीडित पत्नीने पतीविरोधातील आरोप नाकारत आपसातील वाद मिटल्याचे सांगितले. त्यामुळे ती फितूर झाल्याचे स्पष्ट झाले. मात्र, पत्नीने आरोप नाकारले म्हणून तिच्या जीवाला निर्माण झालेला धोका आणि वैद्यकीय पुरावे दुर्लक्षित करता येणार नव्हते. सरकारी वकील ॲड. पाठक यांनी न्यायालयात बाजू मांडताना डॉक्टरांच्या साक्षीकडे लक्ष वेधले. पोटात आढळलेला ब्लेडचा तुकडा प्राणघातक ठरू शकत होता आणि त्यामुळे महिलेचा जीव जाण्याची शक्यता होती, असा युक्तिवाद त्यांनी केला. आरोपीच्या दबावामुळे पत्नीने न्यायालयात साक्ष बदलली असण्याची शक्यताही त्यांनी व्यक्त केली.
साक्षीदार फितूर झाला म्हणून त्याची संपूर्ण साक्ष सरसकट फेटाळता येत नाही, ही बाब न्यायालयाने अधोरेखित केली. उपलब्ध वैद्यकीय पुरावे आणि साक्षीदारांचे जबाब यांचा विचार करून न्यायालयाने आरोपीविरोधातील गुन्ह्याची गंभीरता लक्षात घेतली. पत्नी सध्या आरोपीवर अवलंबून असून त्याच्यासोबत राहत असल्याची परिस्थितीही न्यायालयाने शिक्षेचा निर्णय घेताना विचारात घेतली. त्यामुळे आरोपीला जन्मठेपेऐवजी सात वर्षे सक्तमजुरी आणि ७० हजार रुपयांचा दंड ठोठावण्यात आला.
पत्नीच्या चारित्र्यावर संशय घेऊन तिच्या जिवाशी खेळण्याचा प्रयत्न करणाऱ्या पतीला अखेर वैद्यकीय पुराव्यांमुळे शिक्षा झाली. न्यायालयातील साक्ष बदलली, तरी पुराव्यांपुढे सत्य लपवता येत नाही, हे या निकालातून स्पष्ट झाले.
