राजापूर (तुषार पाचलकर) : जिल्हा परिषद पूर्व प्राथमिक शाळा हरळ येथे केंद्रस्तरीय शिक्षण परिषद क्रमांक ४ बुधवारी (दि. ३० सप्टेंबर) उत्साहपूर्ण वातावरणात पार पडली. सकाळी ११.३० ते सायंकाळी ४.३० या वेळेत झालेल्या या परिषदेत केंद्रातील शिक्षकांनी विविध शैक्षणिक व प्रशासकीय विषयांवर सखोल चर्चा करून मार्गदर्शनाचा लाभ घेतला.
परिषदेत निपुण अभियानाचा शाळानिहाय आढावा, विविध शैक्षणिक पोर्टल, शिक्षणप्रवाहातील बदल, वर्गप्रक्रियेतील सकारात्मक व सुधारात्मक बाबी, शिष्यवृत्ती परीक्षा, अध्ययन निष्पत्तीवर आधारित मासिक नियोजन, शाळा व्यवस्थापन समितीची पुनर्रचना व पाठपुरावा तसेच डिजिटल शैक्षणिक साधनांचा प्रभावी वापर या विषयांवर मार्गदर्शन करण्यात आले. विद्यार्थ्यांच्या शैक्षणिक गुणवत्तेत वाढ करण्यासाठी उपलब्ध शैक्षणिक उपक्रमांचा व साधनांचा प्रभावी वापर कसा करता येईल, यावरही परिषदेत भर देण्यात आला.
परिषदेच्या पहिल्या सत्रात केंद्रसमन्वयक किशोर शिनगारे यांनी निपुण अभियानाचा शाळानिहाय आढावा तसेच विविध शैक्षणिक पोर्टल आणि शिक्षणप्रवाहातील बदल याबाबत शिक्षकांना मार्गदर्शन केले. दुसऱ्या सत्रात वर्गप्रक्रियेतील सकारात्मक व सुधारात्मक बाबी तसेच शिष्यवृत्ती परीक्षेच्या अनुषंगाने सुधाकर जाधव (रायपाटण नं. ३), दिपाली धावडे (रायपाटण नं. १) आणि शारदा रेडेकर (रायपाटण नं. ५) यांनी मार्गदर्शन केले.
तिसऱ्या सत्रात अध्ययन निष्पत्तीवर आधारित मासिक नियोजन या विषयावर धामणपे येथील किशोर चव्हाण यांनी सर्व वर्गशिक्षक व विषयशिक्षकांना मार्गदर्शन केले. चौथ्या सत्रात शाळा व्यवस्थापन समितीची पुनर्रचना व पाठपुरावा याबाबत परुळे नं. ३ येथील मानसी सुर्वे यांनी माहिती दिली. शाळेच्या विकास प्रक्रियेत पालक व शिक्षकांचा सहभाग वाढविण्यासाठी शाळा व्यवस्थापन समितीची भूमिका यावेळी स्पष्ट करण्यात आली.
पाचव्या सत्रात ‘My Gooru App’ तसेच ‘Room to Read’ उपक्रमाची माहिती देण्यात आली. शरद वाशिंबे (परुळे नं. ३) आणि सुनील भांडेकर यांनी डिजिटल साधनांचा शैक्षणिक प्रक्रियेत प्रभावी वापर करून विद्यार्थ्यांचे अध्ययन अधिक परिणामकारक करण्याबाबत मार्गदर्शन केले. याशिवाय प्रशासकीय कामकाज, मासिक कामाचे संकलन आणि अहवाल लेखन आदी बाबींवरही शिक्षकांना आवश्यक मार्गदर्शन करण्यात आले.
परिषदेच्या यशस्वी आयोजनासाठी अहवाल लेखनाची जबाबदारी अश्विनी माने, मासिक काम संकलनाची जबाबदारी परमेश्वर धुळे आणि आभार प्रदर्शनाची जबाबदारी रंगराव चौगुले यांनी पार पाडली. फोटो व व्हिडिओ शूटिंगचे काम शरद वाशिंबे व सुनील भांडेकर यांनी केले. या शिक्षण परिषदेमुळे शिक्षकांना अध्यापन पद्धतीत आवश्यक सुधारणा करण्यासोबतच विविध शैक्षणिक उपक्रम, डिजिटल साधने आणि प्रशासकीय कामकाजाचा प्रभावी वापर करण्यासाठी उपयुक्त दिशा मिळाली. शिक्षकांनी परिषदेत उत्स्फूर्त सहभाग नोंदवत विविध विषयांवरील चर्चेत सक्रिय सहभाग घेतला.
