मुंबई : बोरीवली पश्चिम येथील गोराई-मनोरी सागरी किनाऱ्यावरील रेतीत गेल्या चार महिन्यांपासून रुतून पडलेल्या एका मोठ्या जहाजावर चोरीच्या उद्देशाने घुसलेल्या चार तरुणांचा गुदमरून गूढ मृत्यू झाल्याची धक्कादायक घटना उघडकीस आली आहे. या अडकलेल्या जहाजाच्या बंदिस्त अंतर्गत भागात अचानक झालेल्या विषारी वायूच्या गळतीमुळे अथवा ऑक्सिजनच्या कमतरतेमुळे या तरुणांचा जागीच मृत्यू झाल्याचा प्राथमिक अंदाज असून, या खळबळजनक प्रकारामुळे मुंबईत मोठी खळबळ उडाली आहे.
मिळालेल्या माहितीनुसार, ८ जणांची एक टोळी स्पीडबोटच्या साहाय्याने या जहाजावर चोरी करण्याच्या इराद्याने पोहोचली होती. त्यापैकी एकजण स्पीडबोटवरच थांबला, तर उर्वरित सात जण जहाजात घुसले. यातील चार जण जहाजाच्या तळघरातील भागात लोखंडी पाईप कापण्यासाठी आत उतरले असता तिथे अचानक विषारी वायूची गळती सुरू झाली आणि श्वास कोंडल्याने चौघांचाही आतच तडफडून मृत्यू झाला. घटनेची माहिती मिळताच गोराई पोलिसांनी तात्काळ घटनास्थळी धाव घेतली व परिस्थितीचे गांभीर्य ओळखून भारतीय नौदलाची मदत मागवली. नौदलाच्या पथकाने जहाजाच्या आत उतरून अत्यंत आव्हानात्मक परिस्थितीतून हे चारही मृतदेह बाहेर काढले असून शवविच्छेदनासाठी रुग्णालयात पाठवले आहेत. दरम्यान, या प्रकरणी पोलिसांनी तीन संशयितांना ताब्यात घेतले असून मुख्य सूत्रधाराचा शोध घेण्यासाठी त्यांची कसून चौकशी सुरू आहे.
तपासादरम्यान या जहाजाबाबत अत्यंत गंभीर आणि संशयास्पद माहिती पुढे येत आहे. गेल्या चार महिन्यांपासून किनाऱ्यावर बेवारस स्थितीत असलेल्या या जहाजाचा वापर समुद्रात अवैध डिझेल किंवा तेलाच्या तस्करीसाठी केला जात असल्याचा प्राथमिक अंदाज आहे. जहाजाच्या मालकाविरुद्ध आधीच गुन्हे दाखल असून तो सध्या परदेशात फरार झाल्याचा संशय व्यक्त होत आहे. विशेष म्हणजे या जहाजावर यापूर्वीही दोन वेळा चोरी झाली होती; पहिल्या खेपेस अडीच लाख तर दुसऱ्या वेळी पाच लाख रुपयांचे साहित्य चोरट्यांनी पळवले होते. दोनदा मिळालेल्या यशामुळे तिसऱ्यांदा मोठा ऐवज लंपास करण्याच्या हव्यासापोटी आलेली ही टोळी अखेर मृत्यूच्या सापळ्यात अडकली. पाईप कापताना गॅस कटरमुळे दुर्घटना घडली की बंदिस्त जागेतील विषारी वायूमुळे हा घात झाला, तसेच इतके दिवस हे संशयास्पद जहाज सुरक्षा यंत्रणांच्या नजरेतून कसे सुटले, या सर्व दिशेने गोराई पोलीस अधिक तपास करत आहेत.
