देवरुख पोलीस ठाण्यात नवरात्रोत्सवाच्या पार्श्वभूमीवर सार्वजनिक मंडळांची महत्त्वाची बैठक संपन्न

देवरुख/सिकंदर फरास : आगामी नवरात्रोत्सव शांततापूर्ण व सुव्यवस्थित वातावरणात पार पाडण्यासाठी काल देवरुख पोलीस ठाण्याच्या कार्यक्षेत्रातील सार्वजनिक व खाजगी नवरात्रोत्सव मंडळांच्या पदाधिकाऱ्यांची विशेष बैठक पार पडली. त्यावेळी लांजाचे उपविभागीय पोलीस अधिकारी सुरेश कदम आणि देवरुख पोलीस ठाण्याचे प्रभारी अधिकारी राजेंद्र यादव यांच्या प्रमुख उपस्थितीत काल सायंकाळी ४.३० ते ५.३० दरम्यान ही बैठक घेण्यात आली होती.

या बैठकीमध्ये आगामी उत्सवाच्या अनुषंगाने प्रशासनाकडून काही महत्त्वपूर्ण नियम आणि मार्गदर्शक सूचना जारी करण्यात आल्या आहेत. त्यानुसार सर्व मंडळांनी उत्सवाचे योग्य नियोजन करून आपली नियोजन पत्रिका तात्काळ पोलीस ठाण्यात सादर करणे बंधनकारक करण्यात आले आहे. तसेच उत्सव काळात ध्वनी प्रदूषणाबाबतच्या नियमांचे काटेकोर पालन करतच ध्वनीक्षेपकाचा वापर करावा आणि सुरक्षिततेच्या दृष्टीने विद्युत वायरिंगची तपासणी अधिकृत व्यक्तीकडून करून घ्यावी, अशा सूचना देण्यात आल्या आहेत.
उत्सवादरम्यान वाहतूक कोंडी होऊ नये म्हणून पार्किंगची चोख व्यवस्था राखणे, कोणत्याही प्रकारचे आक्षेपार्ह पोस्टर, बॅनर किंवा धार्मिक व जातीय तेढ निर्माण करणारे मजकूर अथवा चित्रण न लावणे यावर भर देण्यात आला. तसेच सोशल मीडियावर कोणत्याही अफवा किंवा अप्रमाणित रील्स आणि व्हिडिओ प्रसारित करू नयेत, असे आवाहनही पोलिसांनी केले आहे.

धार्मिक रितीरिवाजांनुसार हा उत्सव शांततेत पार पाडावा आणि कार्यक्रमात काही बदल असल्यास त्याची पूर्वकल्पना पोलीस ठाण्याला देण्यात यावी असे स्पष्ट करण्यात आले. याशिवाय, विसर्जन मिरवणुकीच्या वेळी कोणत्याही प्रकारची दुर्घटना किंवा अनुचित घटना घडणार नाही याची विशेष खबरदारी घेण्याचे निर्देशही देण्यात आले आहेत.बैठकीच्या शेवटी पोलीस अधिकाऱ्यांनी मंडळ पदाधिकाऱ्यांच्या अडचणी आणि शंका जाणून घेऊन त्यांना योग्य ते मार्गदर्शन केले.यावेळी उपनिरीक्षक वाघाटे,पोलिस हवालदार सागर मुरुडकर आणि मोठ्या संख्येने मंडळाचे पदाधिकारी उपस्थित होते.