जलजीवन मिशन कामाची ग्रामसभेत प्रत्यक्ष पाहणी होणार; अधिकाऱ्यांच्या उपस्थितीत तोडगा
देवरूख / प्रतिनिधी : कनकाडी (ता. संगमेश्वर) येथील जलजीवन मिशन योजनेच्या कामातील त्रुटी आणि गैरप्रकारांविरोधात विकास बारकू गुरव यांनी पुकारलेले उपोषण प्रशासनाच्या मध्यस्थीनंतर आणि लेखी आश्वासनानंतर अखेर स्थगित करण्यात आले आहे. कामाच्या तक्रारींसंदर्भात विशेष ग्रामसभेत प्रत्यक्ष स्थळपाहणी करून निर्णय घेण्याचे आश्वासन प्रशासकीय अधिकाऱ्यांनी दिल्याने हा तोडगा निघाला.
कनकाडी येथील जलजीवन मिशनच्या कामात अनेक त्रुटी असल्याचा आरोप करत विकास गुरव यांनी प्रशासनाकडे दाद मागितली होती. मात्र, योग्य दखल न घेतल्याने त्यांनी उपोषणाचा पवित्रा घेतला होता. या इशाऱ्यामुळे खडबडून जागे झालेल्या प्रशासकीय यंत्रणेने तातडीने धावपळ सुरू केली. ग्रामीण पाणी पुरवठा विभाग आणि पंचायत समितीच्या वरिष्ठ अधिकाऱ्यांनी आंदोलनकर्त्यांशी थेट संवाद साधला.
यावेळी झालेल्या बैठकीस व चर्चेदरम्यान सहाय्यक गट विकास अधिकारी अक्षय पाटील, बांधकाम विभागाचे कार्यकारी अभियंता कांबळे, ग्रामपंचायत विस्तार अधिकारी घुले, देवरूख नगर पंचायतीचे कोचिरकर, ग्रामसेवक शिंदे यांच्यासह पंचायत समिती सदस्या जाधव मॅडम आणि कनकाडीचे माजी उपसरपंच हेमंत शिंदे उपस्थित होते.
ग्रामसभेत प्रत्यक्ष पाहणी करून प्रश्न सोडवणार ग्रामीण पाणी पुरवठा उपविभागाच्या वतीने उपअभियंत्यांनी दिलेल्या लेखी पत्रानुसार, जलजीवन मिशनच्या कामाबाबत आयोजित विशेष ग्रामसभेत तक्रारदारांच्या उपस्थितीत सविस्तर चर्चा केली जाईल. तसेच प्रत्यक्ष जागेवर जाऊन कामाची पाहणी करण्यात येईल, असे स्पष्ट करण्यात आले. प्रशासनाने दिलेल्या या लेखी हमीनंतर आणि उपस्थित लोकप्रतिनिधी व अधिकाऱ्यांच्या विनंतीला मान देऊन विकास गुरव यांनी आपले उपोषण सद्यस्थितीत स्थगित करण्याचा निर्णय जाहीर केला.
दरम्यान, जर ग्रामसभेत आणि प्रत्यक्ष पाहणीनंतरही कामातील त्रुटींवर ठोस उपाययोजना झाली नाही, तर पुन्हा तीव्र आंदोलनाचा मार्ग पत्करू, असा इशाराही यावेळी आंदोलकांच्या वतीने देण्यात आला. या यशस्वी शिष्टाईमुळे तूर्त कनकाडीतील उपोषणाचा तिढा सुटला असून प्रशासनाने घेतलेल्या भूमिकेचे ग्रामस्थांनी स्वागत केले आहे.
