पावसाने पाठ फिरवल्याने दाभोळे परिसरातील बळीराजा संकटात; भात शेती धोक्यात

दाभोळे/सिकंदर फरास: सप्टेंबर महिना संपत आला असतानाही पावसाने पूर्णपणे पाठ फिरवल्यामुळे दाभोळे आणि आजूबाजूच्या परिसरातील शेतकरीवर्ग मोठ्या चिंतेत सापडला आहे. यावर्षी सुरुवातीपासूनच पावसाचे प्रमाण अपेक्षेपेक्षा कमी राहिले आहे. जरी जुलै आणि ऑगस्ट महिन्यात पाऊस चांगला झाला असला, तरी सप्टेंबरमधील कोरड्या वातावरणामुळे हातातोंडाशी आलेला घास हिरावला जाण्याची भीती निर्माण झाली आहे.

सध्या दाभोळे परिसरात काही दिवसांपासून केवळ ढगाळ वातावरण पाहायला मिळत आहे. काही मोजक्या भागांत पावसाच्या तुरळक सरी पडत असल्या तरी बहुतांश भागात पाऊस न पडल्यामुळे भात पिके सुकू लागली आहेत. सततच्या कडक उन्हामुळे भात शेती करपत असून, पाण्याअभावी पिकांवर रोगाचा प्रादुर्भाव होण्याची शक्यता वाढली आहे.

पाऊस सरींमध्ये देखील नसल्याने पिकांना आवश्यक ओलावा मिळत नाही परिणामी शेतकऱ्यांची मेहनत वाया जाण्याची वेळ आली आहे.दिवसेंदिवस वाढत्या चिंतेमुळे बळीराजा आता आभाळाकडे डोळे लावून पावसाची तीव्र प्रतीक्षा करत आहे.

काबाडकष्ट करून फुलवलेली शेती डोळ्यांसमोर जळत असल्याने शेतकरी हतबल झाले असून, शासनाकडून तातडीने मदतीची अपेक्षा व्यक्त केली जात आहे.