‘देवाजीच्या दारी आज रंगला अभंग’; प्रादेशिक मनोरुग्णालयात भक्तीचा रंग

रत्नागिरी : टाळ-मृदंगाचा निनाद, अभंगांचे सूर आणि विठ्ठलनामाचा गजर… या भक्तिमय वातावरणात प्रादेशिक मनोरुग्णालयातील उपचारार्थींनी गणेशोत्सवाला अनोखा रंग दिला. ‘टाळ बोले चिपळीला, नाच माझ्या संग, देवाजीच्या दारी आज रंगला अभंग…’ या अभंगाने सुरू झालेल्या कार्यक्रमात उपचारार्थींनी उत्स्फूर्त सहभाग घेत आपल्या कलागुणांचे दर्शन घडविले. त्यामुळे मनोरुग्णालयाच्या परिसरात काही काळ पंढरी अवतरल्याचा अनुभव उपस्थितांना आला.

जिल्हा माहिती कार्यालयाच्या लोकसंवाद कार्यक्रमाच्या निमित्ताने आयोजित या उपक्रमात उपचारार्थींनी विविध अभंग, भक्तिगीते आणि गणेशवंदना सादर केली. संत तुकडोजी महाराजांच्या ‘प्रभू हा खेळ दुनियेचा कशाला सांग केलासी…’ या अभंगातून सामाजिक विषमतेचा प्रश्न मांडण्यात आला. तर ‘देव माझा विठू सावळा, माळ त्याची माझिया गळा’ या भक्तिगीताने वातावरण अधिकच भक्तिमय झाले. ‘कशाला जाता दूर, घरातच पंढरपूर’ या गीतातून भक्तीची अनुभूती आपल्या मनातच शोधण्याचा संदेश देण्यात आला.

गणरायाच्या वंदनेवर उपचारार्थींनी केलेल्या सादरीकरणालाही उपस्थितांकडून उत्स्फूर्त प्रतिसाद मिळाला. टाळ-मृदंगाच्या तालावर सहभागी झालेल्या उपचारार्थींनी केवळ कलागुणांचे दर्शन घडविले नाही, तर उपचार प्रक्रियेत आनंद, कला, संगीत आणि सामाजिक सहभागाचे महत्त्वही अधोरेखित केले.

वैद्यकीय अधीक्षक डॉ. संघमित्रा फुले, मानसोपचार तज्ज्ञ डॉ. हरिणाक्षी गोसावी आणि त्यांच्या वैद्यकीय पथकाच्या मार्गदर्शनाखाली हा उपक्रम झाला. उपचारार्थींना केवळ रुग्ण म्हणून न पाहता त्यांच्या सुप्त कलागुणांना वाव देत आत्मविश्वास वाढविण्याच्या दृष्टिकोनातून अशा उपक्रमांचे आयोजन करण्यात आले.

या कार्यक्रमामुळे उपचारार्थी, वैद्यकीय अधिकारी, कर्मचारी आणि उपस्थित नागरिक यांच्यातील संवाद अधिक मोकळा झाला. भक्तिगीतांच्या माध्यमातून उपचारार्थींनी सादर केलेल्या कलाविष्काराने उपस्थितांना भावूक केले. गणेशोत्सवाच्या निमित्ताने मनोरुग्णालयाच्या आवारात साकारलेला हा भक्तिमय सोहळा उपचारार्थींच्या मनातील आनंद आणि सर्जनशीलतेला व्यासपीठ देणारा ठरला.