रत्नागिरी : सैतवडे पेठ मोहल्ला येथे आईच्या आजारपणाच्या चिंतेत तरुणाने जीवन संपविले

रत्नागिरी : आईच्या ब्रेन ट्यूमरवरील शस्त्रक्रियेनंतर ती आजारी असल्याने मानसिक तणावात असलेल्या २४ वर्षीय तरुणाने गळफास घेऊन जीवन संपविल्याची दुर्दैवी घटना जयगड परिसरातील सैतवडे पेठ मोहल्ला येथे १९ सप्टेंबर रोजी रात्री घडली. रंजित दत्ताराम तांडेल (वय २४, रा. धाकटी जांभारी, ता. जि. रत्नागिरी) असे मृत तरुणाचे नाव आहे.

मिळालेल्या माहितीनुसार, रंजित यांच्या आईवर ब्रेन ट्यूमरचे ऑपरेशन झाले होते. आईच्या आजारपणामुळे ते काही दिवसांपासून मानसिक तणावात होते. त्यांना दारूचे व्यसनही लागले होते. १९ सप्टेंबर रोजी घरातील गणपती विसर्जन झाल्यानंतर रात्री सुमारे ८ वाजता चुलत भावाला सोडून येतो, असे सांगून ते घराबाहेर पडले. त्यानंतर त्यांनी चुलत भाऊ केतन तांडेल याला व्हॉट्सॲपवर ‘हा माझा शेवटचा मेसेज आहे’, असा संदेश पाठविला.

हा प्रकार नातेवाइकांच्या लक्षात आल्यानंतर त्यांनी रंजित यांचा शोध सुरू केला. त्यावेळी घरापासून सुमारे १०० मीटर अंतरावर सैतवडे पेठ मोहल्ला येथील स्मशानभूमीजवळील आंब्याच्या झाडाला ते लटकलेल्या अवस्थेत आढळून आले. त्यावेळी ते बेशुद्ध अवस्थेत होते. नातेवाइकांनी त्यांना तातडीने प्राथमिक आरोग्य केंद्र वाटद-खंडाळा येथे नेऊन प्राथमिक उपचार केले. त्यानंतर पुढील उपचारासाठी रत्नागिरीकडे नेत असताना जाकादेवी येथे त्यांच्यात कोणतीही हालचाल जाणवली नाही. त्यामुळे त्यांना प्राथमिक आरोग्य केंद्र जाकादेवी येथे दाखल करण्यात आले. वैद्यकीय अधिकाऱ्यांनी तपासणी करून त्यांना मृत घोषित केले.

या प्रकरणी जयगड पोलीस ठाण्यात आकस्मिक मृत्यूची नोंद करण्यात आली असून, पुढील कार्यवाही सुरू आहे.