कॅनडात विमान प्रशिक्षणादरम्यान अपघात; दोन भारतीय विद्यार्थ्यांचा मृत्यू

दिल्ली : कॅनडामध्ये विमान प्रशिक्षणादरम्यान झालेल्या एका दुर्दैवी विमान दुर्घटनेत दोन भारतीय विद्यार्थ्यांचा मृत्यू झाला. या घटनेची पुष्टी कॅनडातील भारतीय दूतावासाच्या व्हॅंकुव्हर येथील भारताच्या महावाणिज्य दूतावासाने केली आहे.

या दुर्घटनेत मृत्युमुखी पडलेल्या भारतीय विद्यार्थ्यांची ओळख तामिळनाडूतील मनोज शिवकुमार आणि पुद्दुचेरीतील श्रीसरन तिरुग्नानसंबंधम अशी झाली आहे. भारतीय दूतावासाकडून मिळालेल्या माहितीनुसार, दोन्ही विद्यार्थी कॅनडामध्ये व्यावसायिक वैमानिक आणि विमान वाहतूक प्रशिक्षणाचा भाग म्हणून उड्डाणाचा सराव करत होते.त्याचदरम्यान हा अपघात झाला आणि त्यात दोन्ही विद्यार्थ्यांचा दुर्दैवी मृत्यू झाला.भारतीय दूतावासाने हेही स्पष्ट केले आहे की, ते सातत्याने स्थानिक प्रशासन आणि मृत विद्यार्थ्यांच्या कुटुंबीयांच्या संपर्कात आहेत. दूतावासाच्या अधिकाऱ्यांनी सांगितले की, दोन्ही मृत विद्यार्थ्यांचे पार्थिव त्यांच्या मूळ राज्यात सन्मानपूर्वक परत आणण्याच्या प्रक्रियेत कुटुंबीयांना आवश्यक ती सर्व मदत केली जात आहे.

या घटनेनंतर दोन्ही विद्यार्थ्यांच्या घरांमध्ये आणि कुटुंबीयांमध्ये शोककळा पसरली आहे. स्थानिक प्रशासनाकडून या विमान दुर्घटनेच्या कारणांचा तपास सुरू आहे.दरम्यान, विमान दुर्घटनेबद्दल व्हॅंकुव्हर येथील भारताच्या महावाणिज्य दूतावासाने रविवारी शोक व्यक्त केला.

दूतावासाने सोशल मीडिया प्लॅटफॉर्म ‘एक्स’वर पोस्ट करत म्हटले, “व्हॅंकुव्हर येथील भारताचा महावाणिज्य दूतावास तामिळनाडूतील मनोज शिवकुमार आणि पुद्दुचेरीतील श्रीसरन तिरुग्नानसंबंधम यांच्या निधनाबद्दल तीव्र शोक व्यक्त करतो. कॅनडामध्ये विमान प्रशिक्षणादरम्यान झालेल्या एका दुर्दैवी विमान दुर्घटनेत दोन्ही भारतीय विद्यार्थ्यांचा मृत्यू झाला.”

दूतावासाने पुढे म्हटले, “या कठीण प्रसंगी आमच्या संवेदना शोकाकुल कुटुंबीय आणि त्यांच्या आप्तेष्टांसोबत आहेत. मृतदेह भारतात आणण्यासाठी त्यांच्या कुटुंबीयांना आवश्यक ती सर्व वाणिज्य दूतावासीय मदत करण्यास आम्ही तयार आहोत.”