मुंबई : महाराष्ट्र लोकसेवा आयोगाने (MPSC) राज्यातील स्पर्धा परीक्षांच्या संदर्भात एक महत्त्वपूर्ण पाऊल उचलत ३ ऑक्टोबर २०२६ पासून सुरू होणारी बहुप्रतीक्षित राज्यसेवा मुख्य परीक्षा २०२६ पुढे ढकलण्याचा निर्णय जाहीर केला आहे. या निर्णयासोबतच महाराष्ट्र स्थापत्य अभियांत्रिकी मुख्य परीक्षा २०२६ आणि महाराष्ट्र गट-ब (अराजपत्रित) मुख्य परीक्षा २०२६ या परीक्षांच्या तारखांमध्येही बदल करण्यात आला असून त्या तात्पुरत्या स्थगित करण्यात आल्या आहेत.
राज्यसेवा मुख्य परीक्षा २०२५ मधील उत्तरपत्रिकांच्या मूल्यांकनावर राज्यभरातील अनेक विद्यार्थी तसेच विद्यार्थी संघटनांनी गंभीर आक्षेप नोंदवले होते. या तक्रारींची दखल घेत आयोगाने २०२५ च्या उत्तरपत्रिकांचे पुनर्मूल्यांकन करण्याचा निर्णय घेतला आहे. या पुनर्मूल्यांकनामुळे संपूर्ण निकाल आणि भरती प्रक्रिया लांबणीवर पडण्याची शक्यता निर्माण झाली आहे. दरम्यान, कथित पेपरफुटीच्या प्रकरणांच्या पार्श्वभूमीवर प्रश्नपत्रिकांची निर्मिती, छपाई, वाहतूक आणि वितरण या संपूर्ण कार्यपद्धतीमधील सुरक्षिततेवर उमेदवारांच्या एका गटाने थेट प्रश्न उपस्थित केले होते. परीक्षेवरील अविश्वास दूर करण्यासाठी सर्व प्रश्नपत्रिका नव्याने तयार करून परीक्षा पुढे ढकलण्यात यावी, अशी जोरदार मागणी परीक्षार्थी सातत्याने लावून धरत होते.
दुसऱ्या बाजूला, राज्यातील सध्याच्या सर्व परीक्षा पद्धतींचा सखोल आढावा घेऊन आदर्श कार्यप्रणाली सुचवण्यासाठी राज्य सरकारने आधीच एक उच्चस्तरीय समिती स्थापन केली आहे. या समितीने राज्यभरातील परीक्षार्थी आणि विविध घटकांशी विचारविनिमय केला असून त्यांच्या शिफारशी लवकरच सादर होणार आहेत. या सर्व घडामोडींच्या पार्श्वभूमीवर विद्यार्थी, पालक, विद्यार्थी संघटना आणि लोकप्रतिनिधी यांनी दिलेल्या निवेदनांचा साकल्याने विचार करून पारदर्शकतेच्या दृष्टीने आयोगाने या तीनही परीक्षा पुढे ढकलण्याचा अंतिम निर्णय घेतला आहे. सुधारित वेळापत्रक लवकरच जाहीर केले जाणार असल्याचे आयोगाच्या सूत्रांकडून समजते.
