चिपळूण : तालुक्यातील पेढे येथून मूळ पश्चिम बंगालचा रहिवासी असलेला रेंटा हांसदा (वय ३६, रा. फतेपुर कालीतला, थाना होईंगाथा, जि. नोदिया, कोलकाता) हा तरुण बेपत्ता झाला आहे. याबाबत शंकर शांती सरकार (रा. सरकार गौरव नगर, गोंदिया, सध्या रा. खेरशेत, ता. चिपळूण) यांनी चिपळूण पोलीस ठाण्यात रीतसर फिर्याद नोंदवली आहे.
गेल्या चार वर्षांपासून संबंधित व्यक्ती बेपत्ता असून अद्यापपर्यंत त्याचा कोणताही सुगावा लागलेला नाही. पोलिसांनी दिलेल्या माहितीनुसार, या तरुणाची उंची ५ फूट ६ इंच, रंग सावळा, शरीरयष्टी सडपातळ आणि डोक्यावर काळे कुरळे केस आहेत. विशेष ओळख म्हणजे त्याच्या उजव्या हाताच्या करंगळीलगतच्या बोटावर शस्त्रक्रियेची (ऑपरेशन) खूण असून ते बोट थोडे वाकडे आहे, तसेच पायात स्लीपर घातलेली आहे. या वर्णनाची व्यक्ती कोणासही आढळून आल्यास किंवा तिच्याबाबत काहीही माहिती उपलब्ध झाल्यास तत्काळ चिपळूण पोलीस ठाण्याशी संपर्क साधावा, असे आवाहन चिपळूण पोलिसांकडून करण्यात आले आहे.
